2017.06.06 Айтăр, вăййа, тухар-и?

Садсенче чечексем çурăлаççĕ,
Пăла шывĕ юхать çуталса.
Эх, хитре Сител ял сăн-сăпачĕ
Эпир уншăн çунса тăнăран.
Эх, хитре тăван ял сăн-сăпачĕ
Хĕрĕсем вăййа тухнăран!

    Юрă-кĕвĕ, савăнăçлă туйăм, ырă кăмăл, туслăх шавĕ иртенпех хуçаланчĕç çĕртмен пиллĕкмĕшĕнче Сителти клуб таврашĕнче. Ара, кунта ытармалла мар маттур ял-йышăмăр тăванлăхпа ентешлĕх уявне паллă тума пуçтарăнчĕç. Хамăрăн аттен-анне парнеленĕ кĕтесе чыс туса халăх самай нумайăн пухăнчĕç. Вĕсен илемлĕ те илĕртÿллĕ тумĕсем уяв сăн-сăпатне çутатса тăчĕç.
    Мероприяти туллин те питĕ кăсăклăн иртсе кайрĕ. Вăл тĕрлĕ интереслĕ самантпа халăхăмăрăн асĕнче чылайччен упранĕ. Çак паллă кунпа ял-йышăмăра сумлă та хаклă хăнасем: Аслă Арапуç ял тăрăх пуçлăхĕ Станислав Анатольевич Никитин, районти депутатсен пухăвĕн депутачĕ Димитрий Петрович Выросов, ООО «Сидели» пĕрлешĕвĕн ертÿçи Александр Ильич Иванов, вырăнти депутат Юрий Павлович Прискин, «Малалла» тата «Первомайск» хуçалăхĕсен представитĕлĕ Арсентий Николаевич Иванов, Аслă Арапуçĕнчи культура çурчĕн директорĕ Розалия Родионовна Ефимова саламларĕç. Çавăн пекех Сителте çуралса ÿснĕ хăна Иван Сергеевич Журавлев, ялти тава тивĕçлĕ учитель Александра Илларионовна Макарова тата ытти тăванран та хаклă çыннăмăрсем ăшăран та ăшă сăмахсем парнелесе чĕресене савăнтарчĕç.
   Чăн малтанах уяв чăваш тумлĕ хĕрсемпе каччăсем вăйă картине тăрса илемлĕ те илĕртуллĕ юрăсем шăрантарнипе палăрса юлĕ. Вĕсем асатте-асаннесен йăлине чĕртсе тăратса малалла тăсни, чăнах та, пархатарлă пулăм. Çакă куракансен чунĕсенче пăлхануллă та çĕкленÿллĕ туйăм çуратрĕ. Хамăрăн пултаруллă тус-тăвансемшĕн савăнса хавхалантарса тăма вăй-хăват парнелерĕ.
   Çавăн пекех Сителсен кунĕ тĕрлĕ спорт ăмăртăвĕсемпе пуян пулчĕ. Пирĕн пур енлĕ маттур çыннăмăрсем вăйăсенче тивĕçлĕн хăйсене кăтартма тăрăшрĕç. Унта ватти-вĕтти хутшăнса халăхăмăра савăнтарчĕç. Вĕсем вĕрен туртнине, волейбол вылянине, михĕпе, хĕр арăмсем эстафета чупнине, калуш ывăтса тупăшнине пăхса тăма питĕ кăмăллă пулчĕ. Çак уяв хĕвел хыр вăрманĕ хыçне аничченех тăсăлчĕ. Юлашкинчен пур туслă халăхăмăр пĕрлĕхлĕ вăйпа хатĕрленĕ кĕрекере чăвашсен авалхи апачĕпе шÿрпепе сăйланчĕç. Унтан йĕркелÿçĕсене тав туса малашне те çулран çул çакăн евĕр уявсене паллă тумаллине палăртнă хыççăн пĕр-пĕрне саламласа паянхи куна нуммайччен асра тытасса шантарчĕç.