2017.05.29 Вулавăша чечек букечĕпе!

    Кĕнеке – пĕлÿ çăл куçĕ тенĕ мĕн авалтан. Çынсем çак чун апачĕпе туслашнă çем туслашчĕр тесе вулавăшсем ырми-канми вăй хураççĕ.
     Акă çу уйăхĕн 27-мĕшĕнче библиотека тата библиотекарьсен кунне паллă турăмăр. Çак ятпа Сител ялĕнчи вулавăш пунктне те халăх йышлăн пуçтарăнчĕ. Унта Оксана Валериевна Хомуткина салам сăмахĕсене йышăннă çемĕн пухăннисене библиотекапа паллаштарчĕ, унтан вĕсемпе викторина ирттерчĕ.  Вăлах хĕр арăмсен канашĕн ертÿçи пулнипе ялти чи маттур хĕр арăмсене тав хучĕ парса хавхалантарчĕ, малашне те пĕрле ĕçлесе пархатарлă, халăхшăн усăллă ĕçсем тума ырлăх-сывлăх, вăй-хăват сунчĕ.        
      Мероприяти питĕ интереслĕ пулчĕ. Килнисенчен кашнийĕшĕ ятарласа хатĕрленĕ стенд çине библиотекана тата Оксана Валериевна библиотекарье саламсем çырса тав сăмахĕсем каларĕç, асăнмалăх парнесем парса чысларĕç. Чи асра юлмалли парни вара ялти ал ăсти Нина Соколова вĕтĕ шăрçасенчен хатĕрленĕ ытармалла мар хитре чечек букечĕ.
      Уяв ташă каçĕпе вĕçленчĕ. Хăнасем пурте тулли кăмăлпа килĕсене саланчĕç.