Сцена тăчĕ кĕрлесе
Хитре хĕрсем пуррипе!
Кăмăл кайрĕ çемçелсе
Вĕсен çепĕç сассипе!
Чăнах та, куракансен чунĕнче çакнашкал ăшă туйăм çуратрĕç «Сител пики–2017» шоу-конкурса хутшăннă Сител ялĕн илĕртÿллĕ те сăпайлă пикисем. Клубпа вулавăш ĕçченĕсем Ирина Ляковапа Оксана Хомуткина йĕркеленĕ уява Чăваш енри амăшĕпе-ашшĕн, Раççейри экологи çулталăкĕсене, çавăн пекех республикăмăр паллă тунă тăван чĕлхе кунне халалланă.
Мероприяти питĕ интереслĕ те кăмăллă пулчĕ. Çакăнта ял халăхне юратса, вĕсене хисеплесе сцена çине тухса юрланă, ташланă вырăнти пултаруллă хĕр арăмсен, шкул ачисен, çамрăксен тÿпи пысăк. Паллах ĕнтĕ тата хутшăннă пикесен маттурлăхне кура уяв «сăн-сăпачĕ» çуталса та йăл-йăл çиçсе тăчĕ.
«Сител пики–2017» шоу-конкурс хĕрÿ тупăшура иртрĕ. Конкурсанткасем залра ларакансене чĕвĕл-чĕвĕл сассисемпе, акăш евĕр хусканăвĕсемпе, ытарайми ырă кăмăлĕсемпе тыткăнларĕç. Вĕсем пирĕн пурте маттур та пултаруллă. Сцена çинче хĕрсем хăйсене хулари артистсенчен пĕрре те кая мар кăтартрĕç.
Пикесем пултаруллăран та пултаруллипе жюрисене çăмăлах пулмарĕ. Çапла вара ăмăртусенче хăйсене тивĕçлĕн кăтартса пирĕн чиперккесем тÿресен пĕтĕмлетĕвĕ тăрăх тĕрлĕ номинацире палăрчĕç. Анжела Шайманована «Сăпайлă пике», Светлана Матюшкинана «Кăмăллă пике», Анна Реймована «Вице пике-2017», Степанида Степанована «Сител пики -2017» хисеплĕ ятсем çĕнсе илме пултарнишĕн чунтан саламлатпăр.
Уявра пур енлĕ те хитре хĕрсене, юрă-ташăпа савăнтаркансене ялти хисеплĕ те сумлă нумай çул вĕрентекен пулса ĕçленĕ В. И. Козлова, Аслă Арапуçĕнчи пĕрлештернĕ клубсен ерÿçи Р. Р. Ефимова, вырăнти депутат Ю. Н. Степанов, Çĕнĕ Ахпÿрт культура ĕçченĕ Е. Н. Лисицына, тăванĕсем, юлташĕсем саламласа сумлă парнесемпе чысларĕç. Пикесене тата ыттисене те малашнехи пурнан пурнăçра яланхи пек пултаруллă та маттур пулма сунчĕç.