2017.04.03 Кулăш – пурнăçра пулăш

 Шăпах çакăн пек девиза тĕпе хурса пурăнаççĕ Сителсем. Акă паян та ялти шÿте малти вырăна хуракан шкул ачисем кулăш кунĕ ячĕпе клуба пуçтарăнчĕç. Унта вĕсем Ирина Лякова культорганизаторпа Оксана Хомуткина библиотекарь йĕркеленĕ вăйă-конкурссенче хаваспах хутшăнчĕç. Тĕрлĕ ăмăртусенче тупăшрĕç. Шÿтлĕ историсемпе анекдотсем каласа кăтартрĕç, пĕр-пĕрне тăраничченех култарчĕç.

Чи кăсăкли вара вырăссен пурте пĕлекен «Çарăк» юмахне çĕнĕлле кăтартса пани пулчĕ. Ачасем калăпланă сăнарсем питĕ интереслĕ те ĕнентерÿллĕ. Геройсем ку халапра вырăс халăхĕ мĕн авалтан юратнă çимĕçе туртса кăларнипе çеç çырлахмаççĕ, тĕрлĕ хускану туса юрлаççĕ те ташлаççĕ, «Çарăка» шÿтлĕ эпизодсем кĕртсе тата та кăсăклăрах тăваççĕ.

Сител клубĕнче кулăш кунне халалланă мероприяти питĕ интереслĕ иртрĕ. Çакă ачасен тулли те савăнăçлă кăмăлĕсенчен уççăмăнах палăрчĕ.