2017.09.07 Пирĕн фонд пуянланчĕ

Çирĕм пĕрремĕш ĕмĕрте пурăнатпăр. Çак тапхăр нано-технологисем, интернет вăйлă аталаннипе палăрса тăрать. Çĕнĕрен те çĕнни пурнăçа ярса илчĕ пулсан та, халăхăмăр киввине те манасшăн мар теес килет. Калас сăмахăм ман ĕмĕр тăршшĕпе пире пĕлÿ çăл куçĕ патне çул кăтартнă кĕнекесем çинчен-ха.
Чăнах та хальхи вăхăтра страницăллă юлташсенчен нумайăшĕ писни курăнать. Анчах та кĕнекесене малти вырăна хурса хаклакансем те пирĕн хушшăмăр та чылай-ха. Çакă пирĕн ретрех пултаруллă та ăста çыравçăсем, кĕнекеçĕсем пуррипе çыхăннă. Вĕсен «çимĕçĕсем» интереслĕ пулнипе халăх кĕнекесем патне туртăнать.
Акă çакăсенчен пĕри вăл – Татьяна Дорофеева-Миро. Талантлă писатель Вăрмар районĕнчи Арапуç ялĕнче кун çути курнă. Унтах вăл илемлĕ те асамлă вырăнта хăйĕн литературăри пĕрремĕш утăмĕсене тунă.
Татьяна Юрьевна Дорофеева-Миро – Чăваш писатĕлĕсен союзĕн членĕ, Талвирпа Эмине ячĕллĕ премисен лауреачĕ, пултаруллă прозаик, поэт, вун-вун кĕнеке авторĕ. Малтанласа вăл хăйĕн чуна çывăх та чĕрене кăлт-кăлт таптаракан сăввисемпе палăрнă. Халĕ вара эпир тата унăн ачасем валли çырнă вĕрентсе калакан юмахĕсене те вуласа киленме пултаратпăр. Вĕсенче мĕн чухлĕ асамлăх, ăшă сăмах, киленÿлĕх. Татьянăн хайлавĕсене вуласан унăн чĕлхи тĕлĕнмелле пуян та таса пулни тÿрремĕнех курăнать.
Каларăмăр ĕнтĕ Дорофеева-Миро тĕрлĕ енлĕ талантлă та пултаруллă. Çырас енсĕр пуçне çак илемлĕ те илĕртÿллĕ Арапуç пики питĕ ырă пулнипе палăрса тăрать. Вăл çынлăха мала хурса пурне те яланах пулăшма тăрăшать. Акă нумай пулмасть Сител ялĕн вулавăшне Татьяна Дорофеева чи хаклă парнесем парса чыс турĕ. Ял халăхне хисеп туса хăйĕн кĕнекисене ярса пачĕ. Çапла вара пирĕн фонд пултаруллă çыравçăн интереслĕ «туприсемпе» пуянланчĕ. Эпир, вулакансем тата вулавăш ĕçченĕ Оксана Хомуткина Татьяна Дорофеева-Мирона чунтан тав тăватпăр, ăна тата вун-вун кĕнеке пичетлесе кăларма вăй-хăват сунатпăр, унăн парнисене тĕплĕн «шĕкĕлчесе» тухма, тирпейлĕн упрама шантаратпăр.