2017.10.11 Мăнукпа йывăç ларт та ăна упра!

Çутçанталăка упрасси кашни çыннăн тĕп тивĕçĕ. Пирĕн утăм хыççăн утăм тумассерен ун пирки шухăшласа утмалла, епле те пулсан ăна пулăшасчĕ, сăтăр тăвас марччĕ тесе тăрăшмалла.
Çĕршывра çакна шута илсе самай ырă ĕçсем тăваççĕ. Хальхи вăхăтра «Мăнукпа йывăç ларт та ăна упра» акци пырать. Пирĕн сителсем яланах çакăн йышши ыр кăмăллăх ĕçĕсене хастаррăн тухма тăрăшаççĕ. Ку акцие те клуб тата вулавăш ĕçченĕсем хутшăнма пуçарнипе хапăл тусах йышăнчĕç. Унта ял çумĕнчи улăхра çырма-çатраллă вырăнсене вун-вун йывăç хунавĕ лартса çутçанталăка илем кÿчĕç.
Йывăç лартакансем хушшинче Тăван çĕршывăн Аслă вăрçин ветеранĕ Василий Федорович Ляков хăйĕн Ульяна тата Кристина мăнукĕсемпе пулни пысăк пулăм теес килет. Ара фашшистсене хирĕç паттăрла кĕрешнĕскер 95-çулта-çке. Халĕ те вăл общество ĕçсене хастар хутшăнни пире те ун евĕр маттур пулма хистет.
Сителсем çак пулăма Раççейри экологи çулталăкне те халалларĕç. Çапла кашни килес кĕркуннепе çуркунне йывăç лартассине йăлана кĕртесчĕ тесе йышăнчĕç. Çулран çул хунавсен шутне ÿстерсе çутçанталăкшăн тăрăшма ялти ытти пĕлĕшĕсене те явăçтарма шантарчĕç.