2017.10.02 Ваттисен кунне халалланă уяв

Ватта сума сăвакан хăй те ырă куракан тенĕ мĕн ĕлĕкрен. Чăнах та, асатте-асаннесем, кукаçи-кукамайсем пулсан çемьере ăшăрах, тĕнче хитререх. Вĕсем мĕн пурнăç тăршшĕпех пулăшса пыни, ырă канашсем калани кун-çулăмăра самай лайăхлатать.

Юпа уйăхĕн пĕрремĕшĕнче шăпах пирĕн чи сумлă та хаклă çыннăмăрсене хисеплесе кашни çулах ваттисен кунне паллă тăваççĕ, вĕсен умĕнче пуç таяççĕ. Сител ялĕн клубĕнче те библиотекарь Оксана Хомуткина тата культорганизатор Ирина Лякова йĕркеленипе тивĕçлĕ канăва тухнисене халалласа савăнăçлă уяв иртрĕ. Унта пыма кăмăл тунисене çак кун ячĕпе Аслă Арапуç ял тăрăх пуçлăхĕ С.А. Никитин, Патăрьел район депутачĕсен пухăвĕн депутачĕ Д.П. Выросов, «Сидели» ял-хуçалăх пĕрлешĕвĕн ертÿçи А.И. Иванов, Аслă Арапуçĕнчи культура çурчĕн директорĕ Р.Р. Ефимова, вулавăш ĕçченĕ О.В. Хомуткина, ялти хĕрарăмсен канашĕн членĕ Н.В. Соколова ăшă та чуна çывăх ырă сăмахсемпе саламласа канлĕ ватлăх, çирĕп сывлăх, çемье ăшши сунчĕç, кучченеçсемпе сăйларĕç.

Уявра чи асра юлмалли вара – ялти пултаруллă та маттур юлташăмăрсем аслă çулхи тăванăмăрсене хисеплесе, вĕсен çамрăклăхне аса илсе кăтартса панă улах пулчĕ. Ăна культура ĕçченĕсем чăвашсен авалхи йăлисене манас марччĕ, асатте-асаннесен, хальхи ватăсен, пурнăçне тĕплĕнрех пĕлсе асра хăварасчĕ тесе йĕркеленĕ. Çак улахра хĕрсемпе-каччăсемпе пĕрлех уяв хуçисем те çепĕç юрăсем шăрантарчĕç, кăсăклă вăйăсем вылярĕç, ура хуçса ĕлĕххине аса илсе тăпăртатса ташларĕç. Пурте савăк кăмăллă пулса савăнчĕç.

Мероприятие пухăннă çулĕсемпе ватă та чунĕсемпе çамрăк тусăмăрсем чейпе сăйланнă хыççăн турри çак уява тепĕр çул та килме сывлăх патăр тесе ырă туйăмсемпе килĕсене саланчĕç.

Уяв йĕркелÿçисем спонсорсене, ял тăрăх пуçлăхне С.А. Никитина, вырăнти депутата Ю.Н. Степанова, чун чĕререн тав тăваççĕ.