Николай Аверкиевич Исмуков – тĕлĕнмелле пултаруллă, талантлă сăвăç, философ. Ун сăввисене Раççей халăх чĕлхисене, француз, акăлчан, итали чĕлхисене куçарнă.
Çуралнă эпĕ Арапуçĕнче,
Сăвви юрри те Арапуç çинчен.
Апла мĕскершĕн канлĕх тупмалла ман
Çырма-çатраллă Шупашкар енче?..
Николай Аверкиевич Исмуков Патăрьел районĕнчи Аслă Арапуç ялĕнче çуралса ÿснĕ. Йывăр вăхăтра – 1942 çулхи мартăн 2-мĕшĕнче çут тĕнчене килнĕ вăл.
Салху сăввăмсем çаврăнаççĕ ялан çичĕ çаврăм
Элле çитмĕл пилĕк çул пурăнатăп? çапла пултăрах.
Тăван ялăма чирлесе кайиччен эпĕ саврăм,
Юратрăм, каçарăр та, Шупашкартан ытларах.
Николай Исмуков ялти вăтам шкул хыççăн А.М. Горький ячĕллĕ Урал патшалăх университетĕнче вĕреннĕ.
О, альма-матер - çĕр çулхи аннемĕр!
Тараватушăн турăшăн та тавах.
Эпир хутла пĕлнишĕн ĕмĕр-ĕмĕр
Никам та мар, эс тивĕç мухтава
Ун хыççăн та малалла ăс пухса пĕлÿ илнĕ: Мускав патшалăх педагогика университечĕн философи кафедринче аспирантура тата докторантура пĕтернĕ. Чăваш Республикин Патшалăх премийĕн лауреачĕ, философи наукисен докторĕ.
Çунатлă юрă, çивĕч ăс, тÿпе –
Çак пилшĕн тав атте-аннемĕре.
Вышкайсăр çитĕнĕвĕн çутипе
Каçасчĕ çирĕм пĕрмĕш ĕмĕре
Чăваш поэзийĕнче Н.Исмуковăн пултарулăхĕ пурнăç философийĕпе, çепĕç лирикăпа уйрăлса тăрать. Тăван халăх шăпи, аваллăхĕ, нуши – терчĕ, Тăван çĕршыва юратни, ĕçчен халăх паттăрлăхĕ, юрату тата çамрăклăх, ырăпа усал – поэтăн литература анинчи тĕп темисем.
Хăй евĕр пурăнать ирхи тĕнче.
Ăна курма туйма кăна пĕл эсĕ.
Мир пултăр ăшă чĕрçиттÿ çинче,
Мана пит тарават тăван кĕтесĕм.
Вулакансем Н. Исмуков поэтăн сăвви-поэмисене кăмăлласа йышăнаççĕ.Ун поэзийĕ философилле шухăшпа, сăнарлăхпа тата анатрисен хăйнеевĕр техĕмлĕ чĕлхипе пуян.
Саламлă çыру евĕр кун килет.
Унпа мĕнпур пуласлăх, шанчăк, ĕмĕт.
Илемлĕхе савса юрла, поэт,-
Ир пултăр та кун килтĕр ĕмĕр-ĕмĕр