2017.10.30 «Атте - çемье тĕрекĕ»

Кил ăшши аттепе аннерен пуçланать. Вĕсем пурри – чи пысăк пуянлăх. Çемьере аттепе анне пулсан эпир чи телейлисем.
Кăçал ашшĕпе амăшĕн çулталăкĕнче чи хаклă çыннăмăрсен хисепне ÿстерес тесе республикăра чылай ырă ĕç тăваççĕ. Эпир те тăтăшах Сителти клубпа вулавăш ĕçченĕсем чи çывăх тăванăмăрсене чыслама тăрăшатпăр.
Акă канмалли кунсенче «Атте - çемье тĕрекĕ» уяв иртрĕ. Ăна çемьери чи вăйлă та хăюллă, патвар та хастар çыннăмăра халалласа ачасем ашшĕсене юратма, хисеплеме, упрама тата вĕсемпе мухтанма вĕренччĕр тесе йĕркелен.
Çак уявра кĕçĕн классене çÿрекенсем хăйсен чи сумлă та маттур, пултаруллă тăванĕ пирки тĕрлĕ чĕлхепе паллă çыравçăсем çырнă сăвăсене каласа ăмăртрĕç. Кунта тарăн шухăшлă та ырă йĕркесене вулакансем ашшĕсене чунтан юратни тÿрремĕнех курăнчĕ. Пурте сăввисене тăрăшса вĕреннĕ, пĕр йăнăшмасăр каласа пачĕç, асăнмалăх парнесемлĕ те пулчĕç.
Уявăн тепĕр самантĕнче пирĕн пултаруллă ачасемпе амăшĕсем аттесем пирки шăрçаланă юрăсем юрласа савăнтарчĕç. Вĕсене пăхса киленмешкĕн чăннипех кăмăллă пулчĕ. Юрăçсем хăйсен сассисемпе, чуна çывăх йĕркесемпе куракан чĕрине ăшăтса ярса тарăн шухăша путарчĕç. Çакă вăл, паллах, эпир аттесене хисеплесе сума сунăран, çемьере килĕштерсе пурăннăран, вĕсем яланах аннепе пĕрле пирĕншĕн çуннăран.