2017.02.26 Çăварни, çăварни!

Çăварни килет, куртăр-и?
Çуркунне çитет, сисрĕр-и?
Хирĕç тухса илтĕр­-и?
                  Иртнĕ эрнере Раççей халăхĕ çăварни уявне паллă турĕ. Эпир те сителсем нарăсăн 25-мĕшĕнче асатте-асаннесен йăли-йĕркисене хисеплесе хĕле ăсатса яма, çур кунĕсене кĕтсе илме пуçтарăнтăмăр. Çак кун никам та килĕсенче лармарĕç, пурте пĕр кăмăллăн пулса çăварние тухрĕç. Уяв халăх йышлă пулнине кура питĕ кăсăклăн иртрĕ. Хĕрсем, хĕр арăмсем ÿркенмесĕр чăваш тумĕпе çÿçеллĕ тутăрсемпе тухни çак куна тата та илемлетрĕ. Çăварние хисеп туса ялти пултаруллă юрăçсем юрă-кĕвĕпе савăнтарчĕç, чăваш ташшине ташласа чунĕсене кантарчĕç. Çавăн пекех уявра çынсем гире пуканĕ йăтса, михĕпе чупса, калуш ывăтса, шашкăлла выляса, вĕрен туртса пĕр-пĕринпе тупăшрĕç. Пухăннисене район депутачĕ Дмитрий Выросов, вырăнти депутатсем Юрий Степановпа Юрий  Прискин, ООО «Сидели» пĕрлешÿ ертÿçи Александр Иванов, библиотекарь Оксана Хомуткина, культура ĕçченĕ Ирина Лякова, ялти хĕр арăмсен канашĕн членĕ Нина Соколова, ял старостисемпе çамрăкĕсем саламларĕç. Уяв хĕл карчăкне çунтарса ăсатнипе, çĕнтерÿçĕсене парнесемпе чысланипе, лотореяпа вĕçленчĕ. Эпир ял старостисене, депутатсене, ялти хĕр арăмсемпе çамрăксене, ертÿçĕсене уява ирттерсе яма пулăшнишĕн чун чĕререн тав тăватпăр.