2016.12.07 Пурнăç пурăнасси уй урлă каçасси мар

Пурнăç пурăнасси уй урлă каçасси мар тенĕ мĕн авалтан. Чăнах та этемĕн хăйĕн пурнан кунĕсенче темĕн те курма тивет.

Сител ялĕнчи Варвара Михайловна Саватеевана та турри çак çутă тĕнчере савăнăçпа нуши-тертне çителĕклех парнеленĕ. Ун чухнехи йывăр самана, вăрçă çулĕсем çамрăклах ир ĕçе пуçăнма хистенĕ. Кĕçĕн Арапуç пики пур çĕрте те маттур та правур, хăйĕн тивĕçĕсене тÿрĕ кăмăлтан пурнăçлама тăрăшнă. Çавна пулах ăна халăхра ырă ятпа çеç аса илнĕ.

Раштав уйăхĕн улттăмĕшĕнче Мăньакка (тăванĕсем ăна çапла чĕнеççĕ) иртнĕ ĕмĕрĕн вун улттăмĕш çулĕнче çуралнăскер çĕр çул тултарчĕ. Варвара Михайловнана саламлама аякри инçе çула çывхартса пур тăванĕ, кÿршисемпе пĕлĕшĕсем пухăннă. Вĕсемпе пĕрлех район администрацийĕн пуçлăхĕн çумĕ, строительствопа обществăлла инфратытăм аталанăвĕн пайĕн ертÿçи Николай Краснов, халăха социаллă пулăшупа тивĕçтерекен пайăн, районти хĕрарăмсен канашĕн председателĕ Наталия Никитина, Первомайски ял тăрăхĕн пуçлăхĕ Станислав Никитин, районти депутатсен пухăвĕн депутачĕ Дмитрий Выросов, Хусанти «Сеам- Казань» тĕп директорĕ Радик Сахрутдинов, «Кугеси- холод» компанин тĕп директорĕ Сергей Матвеев, вырăнти депутат Юрий Степанов саламларĕç, парнесемпе чысларĕç. Аслă Арапуçĕнчи культура çурчĕн ĕçченĕсем Розалия Ефимовапа Валерий Фролов ертсе пынипе кăмăла çемçетекен юрăсем юрласа савăнтарчĕç. Çавăн пекех Сителти курльтурара вăй хуракан Ирина Ляковапа библиотекарь Оксана Хомуткина чĕререн тухакан чи ăшă сăмахсемпе Мăньакка аппана ырă кăмăл парнелерĕç.

Вăрăм кун-çул пурăнса ирттересси вăл никамшăн та çăмăл мар. Мăньаккашăн та çавах. Хăй паянхи кун çутипе киленнĕшĕн, ачисемпе мăнукĕсене, кĕçĕн мăнукĕсене курса савăнма пултарнишĕн Варвара Михайловна Раисса хĕрне тав тăвать. Кинемей ун патĕнче вунă çул ытла пурăнать ĕнтĕ. Иккĕшĕн хушшинче вĕсен питĕ-питĕ тачă çыхăну, пĕр-пĕрне нихăçан та кÿрентерсе курман вĕсем.

Каласа хăвармалла ĕнтĕ , Сител ялĕнче паянхи кунччен çĕр çула çитекен пулман. Пирĕн Варвара Михайловнан алли çăмăл пуласса шанатпăр, ун пек пĕр ĕмĕр ĕмĕрлекенсем татах пулччĕр.