2017.01.01 ХĔЛ МУЧИ–ытамĕнче!

Вĕлтĕр-вĕлтĕр юр пĕрчи, сарă пике Илемпи, чăваш каччи Ваççили, вăрман тусĕ мулкаччи, упа, кашкăр, симĕс чăрăш, Хĕл Мучи. Ав, мĕн чул хăна ун пур. Камăн тетĕр пуль? Паллах, автан тусăн, Çĕнĕ Çулăн!

Шăпах çак асамлă паттăрсем, илĕртÿллĕ хĕрĕсем, чĕр чунсем, пирĕштисем тата ытти геройсем раштавăн 31- мĕшĕнче ир–ирех Сителти культура çуртне ачасен ёлкине пуçтарăнчĕç. Вĕсене курма килнисем те чылайăн пухăнчĕç. Уява культура çурчĕн культорганизаторĕ Ирина Лякова пуçласа хăнасене, ял-йыша, ачасене Çĕнĕ Çулпа саламласа автан çулне тулли кăмăлпа кĕтсе илсе ирттерсе яма сунчĕ. Унтан пурте пĕрле симĕс чăрăш тавра тăрса юрăсем юрларĕç, тăпăртатса ташăсем ташларĕç, вăйăсем вылярĕç. Çĕнĕ çулăн чи кĕтнĕ хăнисем, Хĕл Мучипе Юр пике килсессĕн вара пĕр-пĕринпе ăмăртмалла сăвăсем каласа савăнтарчĕç. Хĕл хуçийĕ хитре сăмахĕсемшĕн, маттурришĕн кучченеçсем парса хавхалантарчĕ.

Ёлка, чăннипех, питĕ хаваслăн та кăсăклăн иртрĕ. Никам та ахаль лармарĕç, пурте çĕнĕ çул хăнисемпе савăнчĕç, килĕсене тулли кăмăлпа таврăнчĕç.