2017.01.08 Ёлка тавра

Ай, аван-çке юрлама,

Ай, аван-çке ташлама!

Халăх йышлăн пухăнсан,

Тус-тăван пуçтарăнсан!



Чăнах та кÿршĕ-аршă, тус-тăван, ял–йыш пĕрле пуçтарăнсан чунра ăшă туйăм çуралать. Пĕрле савăнса юрлас килсех тăрать. Акă Сителти культура çуртне раштав елкине те ял çыннисем самай нумайăн пухăнса вăхăта усăллă ирттерчĕç. Вĕсем хĕллехи сивве пăхмасăр уява килме май тупрĕç. Пухăннисене ялти вулавăш ертÿçи Оксана Хомуткина Раштав ячĕпе чун-чĕререн ăшшăн саламларĕ, малашне те пĕрле килĕштерсе вăй хума сунчĕ.

Уявра пурте пĕрле савăнса юрăсем шăрантарчĕç, ташăсем ташларĕç, вăйăсем вылярĕç. Ялти кассем хăйсен пултарулăхĕсемпе паллаштарчĕç. Елкăна тĕрлĕ тум тăхăннă геройсем те килме хапăл турĕç. Вĕсем хăйсен номĕрĕсемпе, юрри-ташшисемпе куракансене тĕлĕнмеллипех тĕлĕнтерчĕç. Сителсем маттуррине кура елка питĕ чаплă иртсе кайрĕ.

Çак кунах пире чыс тăвакансем те пулчĕç. Ялта çуралса ÿснĕ, хăйсен çамрăклăхне Сителти клубрах савăнса ирттернĕ Николай Николаевичпа Татьяна Васильевна Шалинсем парне парса хавхалантарчĕç. Вĕсене тăван ялти культура вучахне сÿнме паманнишĕн, яланах пулăшса пынишĕн пысăк тав сăмахĕ калатпăр, çирĕп сывлăх сунса саламлатпăр.

Раштав елкине пырса савăнма хапăл тунисене чĕререн тав тăватпăр, малашне те уявсене яланах пĕрле ирттересчĕ!