2016.03.16 «Çăлкуçа» тăваллăн алă çупса хавхалантарчĕç

Патăрьел районĕнчи «Çăлкуç» халăх фольклор ансамблĕ (ертÿçи Владимир Верликов ) пуш уйăхĕн 15-мĕшĕнче Хирти Пикшик ял тăрăхĕнчи Тикешре хăнара пулчĕ. Хăтлă та ăшă ял клубĕнче халăх чылай пуçтарăннă.

Артистсене ăшă кăмăлпа кĕтсе илчĕç, кашни юрра-ташша, сăвва-шÿте тăвăллăн алă çупса хавхалантарса тăчĕç. Кунта пуçтарăннă çынсене анатри чăвашсен юррисем уйрăмах кăмăла кайрĕç. Хĕрарăмсен ушкăнĕ ташша тухсан вара нумайăшĕ чăтса лараймасăр пĕрле ташша яра пачĕ. Концерта питĕ шайлашуллă Любовь Верликова ертсе пычĕ, вăл ял халăхне ырлăх-сывлăх, телей, юрату сунса илемлĕ сăвăсемпе савăнтарчĕ.

2016 çул Раççейре кино, Чăваш Республикинче ĕç çынни Çулталăкĕ . Чăваш халăх юррисем кăна мар кинори тата ĕç халăхне чыслакан юрăсем программăна кĕртни концерта татах та пуянлатрĕ . «Çăлкуçа» тăваллăн алă çупса хавхалантарчĕç, тав сăмахĕсем каларĕç.

Çакăн пек ăшшăн иртрĕ Тикеш ялĕнчи тĕл пулу.