Кӑҫал пуш уйăхĕн 5-мĕшĕнче хурҫӑ саслӑ Василий Егорович Митта ҫуралнӑранпа 110 ҫул ҫитрӗ. Пултаруллӑ сăмах ăстине хисеплесе Чăваш Республикин наци библиотеки, «Чăваш наци конгресĕ» регионсен хушшинчи общество организацийĕн вĕренÿ комитечĕ, «Хыпар» Издательство çурчĕн литературăпа культура тата искусство «Тăван Атăл» журналĕпе чăваш ачисен «Тантăш» хаçачĕ республика шайĕнче «Сăваплă ят» викторина ирттерчĕç.
Пуш уйăхĕн 27-мĕшĕнче Чăваш Республикин наци библиотекийĕнче Митта Ваҫлейӗ ҫуралнӑранпа 110 ҫул ҫитнине халалланă «Аслӑ Арапуҫ юманӗ» поэзи уявĕн «Сăваплă ят» викторина пӗтӗмлетӗвӗ иртрĕ. Тĕп библиотекăна пултарулăх ăмăртăвĕн çĕнтерÿçисемпе, конкурса хастар хутшăннисем хушшинче Патăрьел районӗнчи Алманчă библиотекин ертÿçи Т. Каруева та пулчӗ.
Викторина жюрийĕн председателĕ, Чăваш Республикин тава тивĕçлĕ вĕрентекенĕ Геронтий Никифоров литература ăмăртăвне 220 ĕç килни çинчен пĕлтерчĕ. Пĕтĕмпе 260 çын хутшăннă. Çӗнӗ Шупашкарти Митта Ваçлейĕ ячӗллӗ 20-мӗш номерлӗ вӑтам шкулӑн вырӑс чӗлхипе литератури вӗрентекен, Митта Петӗрӗн мӑнукӗ Марина Волченкова Василий Егорович Митта кун-çулĕпе тата пултарулăхĕпе паллаштарчĕ.
Поэзи уявне Митта Ваçлейĕн тăванĕсем: мăнукĕ Дарья Мартыненко, Александра Егоровнăн хĕрĕсем Ольга Васильевнăпа Елизавета Васильевна тата чăваш халăх писателĕ Анатолий Кипеч хутшăнчĕç.
Çĕнтерÿçĕсене «Тӑван Атӑл» журнал редакторĕ, сӑвӑҫ, публицист, общество ĕçченĕ Лидия Филиппова тата «Тантăш» хаçат редакторĕ Алина Ларшникова саламларĕç.
Чăваш литератури ÿсĕмĕн кун-çулĕнче паллă йĕр хăварнă паттăр та тÿрĕ кăмăллă Василий Егорович Миттана хисеплесе ирттернĕ «Аслă Арапуç юманĕ» поэзи уявĕпе «Сăваплă ят» викторина чыславĕ сумлă çыравçăн ячĕ ĕмĕр-ĕмĕр тăван халăх чĕринче пулнине тепĕр хут çирĕплетрĕ.