31 октября 2020 г.
Чăваш Республикин Пуçлăхĕн Олег Николаевăн Хушăвĕпе республикăри кашни яла 100 пин укçа-тенкĕ уйăрса панă. Муниципалитетсем хăйсен йышăнăвĕпе çак укçапа ял тăрăхĕсене хăтлăх кĕртес тĕллевпе тĕрлĕ ĕç-пуç туса ирттернĕ.
Урхас Кушкă ялĕнче пурăнакансем пĕрле пухăнса канашланă хыççăн çак укçана ача-пăча вылямалли лапам тăвасси çине тăкаклама шутланă. Нумаях пулмасть çĕнĕ оборудовани Урхас Кушкăна килсе çитнĕ. Хастар та пултаруллă ял çыннисем çийĕнчех ĕçе тытăннă. Ача-пăча вăййисем валли кирлĕ объектсем лапамра хăйсен вырăнне тупрĕç те ĕнте. Район Пухăвĕн депутачĕ Александр Краснов пĕлтернĕ тăрăх, çак пархатарлă ĕçре уйрăмах ял тăрăхĕн депутачĕ Р.Федорова, çавăн пекех В.Егоров, Д.Карпов, Н.Памиков, О.Самсонов ял çыннисем хастар пулчĕç.
Урхас Кушкăра пурăнакансем Чăваш Ен Пуçлăхĕ Олег Николаев Чăваш автономийĕ 100 çул тултарнине чысласа пуçарнă ĕç çынсемшĕн çав тери курăмлă пулнине палăртса хăварчĕç.
О. СЛАВИНА.