19 марта 2019 г.
«Камсем эпир, мĕнле кăкран эпир?
Ăçти тусан пирĕн ÿте хуратнă?
Ăçти шыв-шур пирĕн пите шуратнă?
Мĕнле çилпе те хĕвелпе эпир,
Кăлкан çилхи пек, кăмăла вылятнă?»
Петĕр ХУСАНКАЙ
«Хăвăр аслаçăрсемпе мăн аслаçăрсене пĕлетĕр-и эсир? Мĕн ятлă пулнă вĕсем? Миçе сыпăк таран пĕлетĕр?»-çакăн пек ыйтусемпе пуçларĕ тĕлпулăва Эдуард Сергеевич Ушаков.
Нумаях пулмасть Тĕмер шкулĕнче сумлă хăнасем - Чăваш Республикинчи çыравçăсен союзĕн членĕпе Эдуард Ушаков таврапĕлÿçĕ-пе Владимир Разин ÿнерçĕ пулчĕç. Эдуард Сергеевич тахçантанпах ĕнтĕ Тăрмăш ялĕн, район историне тĕпчет, кĕнеке хыççăн кĕнеке пичетлесе кăларать. Авалхи чăвашсен ячĕсене тĕпчесе çырнă «Имена наших предков» кĕнекен 4-мĕш томне парнелерĕ таврапĕлÿçĕ. Кĕнекесене Владимир Ильич илемлетнĕ. Вĕсене Мускаври архивсенче упранакан 17-мĕш ĕмĕрти перепись материалĕсем тăрăх çырнă. Çак паха кĕнекесене кăларма Тĕмер ялĕн маттур ывăлĕ, шалти службăсен генерал-майорĕ Василий Федоров пулăшнă. Тата маларах эпир «Описания деревень Янтиковского района» кĕнекене алла илнĕччĕ. Унсăр пуçне Эдуард Сергеевич Кармал, Тĕмер тата Вăтаяль ялĕсенче пурăннă çынсен авалхи списокне хатĕрлесе панă. Йăх-несĕлпе, халăх историйĕпе кăсăкланакансемшĕн ку питех те пысăк парне. Палăртас килет, çамрăксем ял историйĕпе, йăх-несĕлпе интересленеççĕ. Çĕнĕ кĕнекесем малалла тĕпчев ĕçĕнче пулăшасса шанатпăр. Хăнасене ачасем алă çупса тав турĕç.