07 декабря 2016 г.
Килес çул районти ветерансен организацийě йěркеленнěренпе 30 çул çитет. акна халалласа ветерансен районти канашě юнкун Уçырма вǎтам шкулěн спорт залěнче пневматикǎллǎ винтовкǎран тěл перессипе ǎмǎртусем ирттерчě. Унта пурě 9 команда хутшǎнчě.
Зала пуçтарǎннисене вǎрçǎпа ěç, хěç-пǎшаллǎ вǎйсен, право хуралěн органěсен ветеранěсен канашěн председателě Виталий Петров саламларě. Виталий Григорьевич ветерансем пур çěрте те хастар пулнине палǎртрě : вěсем хорта та юрлаççě, общество ěçěнче те яланах малти ретре, спортпа та туслǎ. Ǎмǎртусенче лайǎх кǎтартусемпе савǎнтарма ǎнǎçу сунчě. Ун сǎмахěсем çумне Раççей ДОСААФěн районти уйрǎмěн председателě Викентий Владимиров та хушǎнчě.
Ветерансем ǎмǎртусене тǎрǎшса хатěрленни тÿрех палǎрчě. Катекри «Шевле» халǎх фольклор ушкǎнěн ертÿçи Людмила Маскина хěрарǎмсем хушшинче пуринчен те нумай очко (15) пуçтарса çěнтерÿçě пулса тǎчě. Уçырмари Культура çурчěн директорě Юлия Николаева иккěмěш вырǎна тухрě.
Арçынсем хушшинче Уçырмара пурǎнакан Петр Николаев пуринчен те çивěч куçлǎрах пулчě. Вǎл 13 очкопа малти вырǎна тухрě. Ухман ялěн старостин, педагогика ěçěн ветеранěн Василий Александровǎн (12 очко) иккěмěш кǎтарту. Районти ветерансен канашěн председателě Виталий Петров (11 очко) пьедесталǎн виççěмěш картлашки çине хǎпарчě.
Командǎсем хушшинче малти вырǎнсем çапларах пайланчěç : 1-мěш вырǎн - Ачча ял тǎрǎхěн командин, 2-мěшěнче – район администрацийěн, 3-мěшěнче Ухман ял тǎрǎхěн командисем.
-Çавнашкал мероприятисене, ǎмǎртусене хутшǎнса мěн чухлě хавхалану илетпěр эпир, вǎй-хал кěрет, пěр-пěринпе курнǎçатпǎр, калаçса кǎмǎла çěклетп. Кун пек тěлпулусенче хамǎрǎн чир-чěр çинчен те манса каятпǎр. Тавах ǎмǎрту йěркелÿçисене, - чунне уçрě Вǎтакас Кипеч ял тǎрǎхěнчи ветерансен пуçламǎш организацийěн председателě Ольга Яковлева. Çулěсене кура мар маттур-ха Ольга Васильевна .Вǎл çулсерен йěлтěрçěсен турнирěсене хастар хутшǎнать.
Ǎмǎртǎва хутшǎннǎ кашни çын çинченех ырǎ сǎмах калама пулать. Вěсем хǎйсен кун-çулне пархатарлǎ ěçре ирттернě, çамрǎк чухнехи вашаватлǎха паян та çухатман, пурнǎçǎн кашни саманчěпе савǎнма пěлеççě.