15 мая 2014 г.
Майăн 8-25-мĕшĕсенче район территорийĕнче "Частник" операци иртет. Вырăнти патшалăх техника надзорĕн инспекцийĕ майăн 8-мĕшĕ тĕлне район территорийĕнче 604 единица техника регистрацилерĕ, вăл шутра хăй тĕллĕн çỹрекен 310 машина тата 100 трактор прицепĕ. Агропромышленность комплексĕнче хăй тĕллĕн çỹрекен 150 машина тата 40 трактор прицепĕ шутланса тăрать. Асăннă операцие ирттерме комисси йĕркелерĕмĕр. Вăл Хĕрлĕ Чутай тата Çĕмĕрле районĕсен патшалăх техника надзорĕн инспекторĕпе администраци, ял тăрăхĕсен специалисчĕсенчен тăрать. Рейд вăхăтĕнче тракторсен, хăй тĕллĕн çỹрекен машинăсен тата прицепсен техника юсавлăхне, тракторист-машинист удостоверенийĕ пуррине, транспорт хатĕрне регистрациленине, техника тĕрĕслевĕ витĕр кăларнине, ăна ОСАГО страхлавĕ тунине тĕрĕслĕпĕр. Хăй тĕллĕн çỹрекен транспорт хуçисен техникăпа усă курнă чух правилăсемпе ыйтнисене пăхăнмалла. Хăйĕн ресурсне ĕçлесе татнă машинăсене регистрацирен е шутран кăлармалла. Саккуна пăхăнманнисене административлă явап тыттаратпăр. Н.ПЕТРОВ, Хĕрлĕ Чутай тата Çĕмĕрле районĕсен патшалăхăн аслă инспекторĕ.