30 октября 2013 г.
Раççей Президенчĕн саламлă çырăвĕсемпе Аслă Отечественнăй вăрçăра пулнисене тата тылра ĕçленисене сумлă юбилейĕсемпе саламласси малалла пырать.
Иккĕмĕш Хурашашра пурăнакан Елена Сергеевна Афанасьева октябрĕн 27-мĕшĕнче хăйĕн 90 çулхи юбилейне кĕтсе илнĕ. Çак кун ун патне Президентăн саламлă Çырăвĕ çитнĕ. Ăна ветеран патне район администрацийĕн пуçлăхĕ Александр Башкиров, Хусанушкăнь ял тăрăхĕн пуçлăхĕ Любовь Кузнецова, социаллă хÿтлĕх пайĕн представителĕ Валентина Казакова çитернĕ, ватăна сумлă юбилей ячĕпе саламланă, çирĕп сывлăх суннă.
Вăрçă çулĕсенче Елена Сергеевна окоп та чавнă, сухапа та ĕçленĕ, хĕллехи кунсенче вăрманта йывăç каснă, вакунсене хăйăр тултарнă çĕрте тăрăшнă. Йывăрлăхсене çĕнтерсе тăватă ачине пăхма вăй-хал çитернĕ вăл. Шел те, икĕ ачи пĕчĕклех çĕре кĕнĕ унăн. Çапах та ывăлĕпе хĕрне тĕрĕс-тĕкел вĕрентсе пурнăç çулĕ çине кăларма пултарнă.
Паянхи кун Елена Афанасьева ывăлĕн çемйипе, 11 мăнукĕпе 9 кĕçĕн мăнукĕн тата вĕсен икĕ ачин ăшшине туйса пурăнать.
А.АЛЕКСЕЕВА.