Публикации » Хĕвел çаврăнăш çитĕнтереççĕ

Укçа тăвасси нихăçан та çăмăл пулман. Ял хуçалăх производствинче вара кашни пусшăн хĕлĕн-çăвĕн тăрăшмалла. Кунта вырсарникунĕ те, уявĕ те çук. Кĕмĕлне ытларах кĕртес тесен çĕнĕлĕхсемпе те усă курма тивет. Акă, Ленин ячĕллĕ агрофирмăра кăçал хĕвел çаврăнăш акса ÿстернĕ. Кÿршĕ регионта, Чĕмпĕр тăрăхĕнче ăна çитĕнтернине пурте пĕлетпĕр-ха, анчах кун пек тĕслĕх районта пулманччĕ. 100 гектарта çитĕнекен культура халь сап-сарă чечекре ларнăран аякранах курăнать.

–Маларах Чĕмпĕр тăрăхĕнчи пĕр хуçалăха кайса технологийĕпе паллашрăмăр, унтан вăрлăхне те хăйсенченех туянтăмăр. Пĕр гектар пуçне 5 килограмм вăрлăх кирлĕ, çакна шута илсе акрăмăр. Хĕвел çаврăнăшăн пуçĕ ытлашши те пысăк пулмалла мар иккен: усăнса аннипе пуçтарса илме йывăрланать, – тет Ленин ячĕллĕ агрофирмăн ертÿçи Ю.Попов.

Вырма вĕçленнĕ тĕле хĕвел çаврăнăш та пиçсе çитет. Ăна пуçтарса кĕртме тĕш тырă выракан комбайнсемпех, ятарлă хушма хатĕре çирĕплетнĕ хыççăн, усă курма палăртнă.