Публикации » Вĕсем – йăла-йĕркене чĕртсе тăратакансем

Иртнĕ эрнере хăйсен професси уявне культура ĕçченĕсем паллă турĕç. Ку професси çыннисем пултаруллă, пуçаруллă. Вĕсем хăйсен таланчĕпе, вăйлă характерĕпе тата пысăк чунĕпе палăрса тăраççĕ. Ахальтен-им культура ĕçченĕсемсĕр районта пĕр мероприяти те иртмест. Тирпей-илем кÿрес ĕçре те вĕсен тÿпи пысăк. Йăла-йĕркене чĕртсе тăратакансем, çамрăк ăрăва вĕсемпе паллаштаракансем те культура ĕçченĕсемех. Çавăнпа та музейсенче, вулавăшсенче, культура çурчĕсенче тимлекенсем наградăсене тивĕçех.

Професси уявне паллă тунă кун Туканашри клуб заведующийĕнче вăй хуракан Г.Ванягина район пуçлăхĕн Тав çырăвне тивĕçрĕ. Ку тытăмра чылай çул тÿрĕ кăмăлпа ĕçленĕшĕн Ачкасси Культура çурчĕн заведующийĕ Л.Зверева, Мăн Этмен Культура çурчĕн ĕçченĕ А.Ярабаев, Пантьăк клубĕн заведующийĕ М.Коробков район администрацийĕн пуçлăхĕн Хисеп грамотисене илчĕç. Анчах та вĕсемшĕн чи пысăк награда вăл – çынсен куçĕсенче савăнăç курасси. Культура ĕçченĕсенченех-çке уяв мĕнле шайра иртесси килет.