Публикации » «Район хаçатне ачаранпах юратса вулатăп»

Березовка ялĕнче çуралса ÿснĕ Николай Александрович Ярлов ачаранпах район хаçатне юратса вулать. Шăпа ăна Канаш хулине те çитернĕ, унта вăл ĕçлесе пурăннă. Халĕ Николай Александрович каллех тăван ялĕнче кун кунлать, Березовкăри вăхăтлăх пурăнмалли уйрăмра тимлет. Район хаçачĕн кашни кăларăмне чăтăмсăррăн кĕтет вăл. Çавăнпах пулĕ район хаçачĕн редакцийĕ çулсерен ирттерекен конкурссене сăнасах тăрать, май пур таран хутшăнма та тăрăшать. Акă хаçат страницисенче иртнĕ çул Вĕрентекен çулталăкне халалласа йĕркеленĕ "Кивĕ сăн ÿкерчĕк" конкурса Н.А.Ярлов Трапайри тулли мар вăтам шкулта вĕренекенсене (1933-1934 вĕренÿ çулĕ) сăнлакан ÿкерчĕке тăратнă. Çулĕсене кура çак ÿкерчĕк "Чи кивĕ сăн ÿкерчĕк" номинацире çĕнтерчĕ. Çак кунсенче çĕнтерÿçĕ редакцин Хисеп грамотипе парнине тивĕçрĕ.

"Район хаçачĕн ячĕ темиçе хутчен те ылмашăнчĕ ĕнтĕ, паянхи кун та эпĕ ăна юратсах вулатăп, кашни статйине тишкеретĕп. Мана тĕрлĕ пĕлтерÿсемпе паллашма питĕ килĕшет, çавăн пекех район пурнăçне сăнлакан статьясем кăсăклантараççĕ", – пĕлтерчĕ хăйĕн шухăшне хаçат тусĕ.