12 мая 2012 г.
Чăваш наци библиотекинче Шупашкарти Пĕтĕм тĕнчери кинофестивале халалланă пресс-конференци иртнĕ. Унта программа директорĕ Сергей Лаврентьев киновед, фестивалĕн тĕп режиссерĕ Дмитрий Капустин, ЧР культура министрĕн çумĕ Вячеслав Фошин, культура программисен республика дирекцийĕн пуçлăхĕ Максим Матросов хутшăннă.
Кăçалхи фестиваль çу уйăхĕн 21-26-мĕшĕсенче куракансене пиллĕкмĕш хут пуçтарĕ. “Çеçпĕл” кинотеатрта уçăлĕ вăл.
Программăна Раççейре кăна мар, ют çĕр-шывсенче е пĕрле ÿкернĕ кинофильмсене кĕртнĕ. Куракансене халĕччен ниçта та кăтартман ĕçсемпе паллаштарĕç. Тĕслĕхрен, 2008 çулта ÿкернĕ “Радуга” фильм /режиссерĕ В.Чепрасов/ пысăк экран çине тухман. “БАгИ” ĕçе те /А.Богатырев/ Чăваш Республикинче пурăнакансем чи малтан хак парĕç. “Случайная связь” /О.Столповская/, “Whisky с молоком” /А.Михайлов, Раççей-Польша/ кинофильмсене те Мускавра 2-3 хут çеç кăтартма ĕлкĕрнĕ.
Пĕтĕмĕшле илсен фестиваль вăхăтĕнче 35 фильм кăтартма палăртнă. Вĕсенчен 12-шне конкурс программине кĕртнĕ. Билетсене кинотеатра сеансчен пĕр кун маларах тÿлевсĕрех кайса илмелле. “Çеçпĕл”, Мир Луксор”, “Атăл”, “Синема-5” кинотеатрсем, “Каскад” кинокомплекс, “Салют”, П.Хусанкай ячĕллĕ тата Трактор тăвакансен культура керменĕсем, ЧР Патшалăх электрон тата кинодокументаци архивĕн кинозалĕ куракансене йышăнма хатĕр. Фильмсене хăш-пĕр район центрĕсенче те кăтартĕç.
Çавнашкалах мероприятисен йышĕнче - “Фестивальсен фестивалĕ”, “Автор кинофильмĕ”, “Ачасене - кино” программăсем, Раççей историйĕн çулталăкне халалланă кинокартинăсем, “Каçхи фильм” ятарлă проект.
Жюри членĕсем те паллă. Вĕсем - совет тата вырăс кинодраматурги классикĕ Павел Финн сценарист, Елена Чижова çыравçă, Алла Гербер кинокритик, Вячеслав Сачков оператор, Андрей Эшпай продюсер, режиссер.
Чăваш патшалăх культурăпа искусствăсен институтĕнче Шупашкарти Пĕтĕм тĕнчери кинофестивалĕн киношкулĕ уçăлĕ. Унăн ĕçне Раççей тава тивĕçлĕ артистки Татьяна Малыщицкая йĕркелесе пырĕ. Паллă сценаристсемпе режиссерсем, операторсемпе киноведсем, кинокритиксемпе актерсем сăмах илĕç.
Мероприятие Игорь Верник, Александр Лазарев-кĕçĕнни, Сергей Фетисов, Оскар Кучера, Евгений Герасимов, Дмитрий Астрахан, Ирина Апексимова актерсем хутшăнма кăмăл тунă. Фестиваль президенчĕ, Раççей халăх артисчĕ Карен Шахназаров килессе кĕтетпĕр.
Источник: "Чăваш хĕрарăмĕ"