11 мая 2012 г.
Çу уйăхĕн 21-26-мĕшĕсенче Шупашкарта Пĕтĕм тĕнчери кинофестиваль иртесси пирки пĕлтернĕччĕ ĕнтĕ. Ăна РФ Культура министерстви пулăшнипе йĕркелеççĕ. Кăçалхипе вăл пиллĕкмĕш хут иртет.
Çу уйăхĕн 4-мĕшĕнче Чăваш наци библиотекинче иртнĕ пресс-конференцие программа директорĕ, фестивалĕн пултарулăх ертÿçи Сергей Лаврентьев киновед, фестивалĕн тĕп режиссерĕ Дмитрий Капустин, çавăн пекех ЧР культура министрĕн пĕрремĕш çумĕ Вячеслав Фошин, культура программисен республика дирекцийĕн директорĕ Максим Матросов хутшăнчĕç.
- Программа хатĕр, жюри членĕсем те паллă. Фестивалĕн кăçалхи программине Раççейре çеç мар, ют çĕр-шывсенче е пĕрле ÿкернĕ кинофильмсене те кĕртнĕ. Çакна та палăртмалла: куракана халĕччен ниçта та кăтартман ĕçсемпе паллаштарăпăр. Сăмахран, 2008 çулта ÿкернĕ «Радуга» кинофильмăн /режиссерĕ В.Чепрасов/ премьери шăпах Шупашкарта пулĕ. «БАгИ» /А.Богатырев/ пирки те çавнах каламалла. Уяв «Кинофестиваль» /В.Пичул/ фильмпа уçăлĕ. «Случайная связь» /О.Столповская/, «Whisky с молоком» /А.Михайлов, Раççей-Польша/ кинофильмсене те Мускавра 2-3 хут çеç кăтартнă. Программа йĕркеленĕ май тепĕр чухне кăлтăксем те сиксе тухаççĕ. Хăш-пĕр продюсер е режиссер хăйсен ĕçĕсене «пиратсем» копи тăвасран шикленнĕрен фестивальте кăтартма килĕшмеççĕ. Кинофильм халăх умне тухсан тин пурăнма пуçланине ăнланмаççĕ ахăртнех, - терĕ Сергей Александрович.
- Сирĕн шухăшăрпа - Раççей кинематографисчĕсем фестивале еплерех хаклаççĕ? - кăсăкланчĕç журналистсем.
- Канн фестивалĕ шайне çитеймен пулин те вăл Мускав хăнисене çав тери килĕшнине палăртмалла. Хăйне евĕрлĕ ăшăлăхпа йышăнаççĕ вĕсем ăна, кунта хăйсене хăтлă туяççĕ. Çавăнпа та Шупашкара килес текен чылай. Тепĕр тесен вĕçкĕнлĕх, куçа ытлашшипех шартаракан хĕрлĕ кавир, пальма, чаплă «çăлтăрсем» мĕн тума кирлĕ? Нумай çыншăн «çăлтăрсем» - ниме тăман сериалсенче вылякансем. Манăн шухăшăмпа, çакă укçа тăккалани çеç. Фестивальте кăтартакан кинофильмсенче ÿкерĕннĕ артистсем килни те çителĕклĕ, - пулчĕ хурав.
Сăмах май, Шупашкарти фестивале Раççей кинематографи «çăлтăрĕсенчен» Игорь Верник, Александр Лазарев-кĕçĕнни, Сергей Фетисов, Оскар Кучера, Евгений Герасимов, Дмитрий Астрахан, Ирина Апексимова тата ыттисем те хутшăнĕç. Карен Шахназаров та пирĕн патăмăра çитме палăртнă.
- Сергей Александрович, сире Чăваш Ене мĕн туртать-ха?
- Пурин те лайăх пахалăхлă, чăн-чăн, çĕнĕ, рекламăсăр кинофильм пăхма ирĕк пур. Фестиваль шăпах çапла майсем туса парать те. Эсир çакна тивĕçлĕ.
Максим Матросов Чăваш патшалăх культурăпа искусствăсен институтĕнче «Шупашкарти Пĕтĕм тĕнчери кинофестивалĕн киношкулĕ» ĕçлесси пирки асăнчĕ. Унта хутшăнас текенсен малтан регистрациленмелле, каярах вĕсем ятарлă сертификата тивĕçĕç. Тепĕр самант: куракансем ыйтнипе хăш-пĕр кинофильма икшер хут кăтартĕç. Билетсене кинотеатра сеансчен пĕр кун маларах кайса илмелле, тÿлевсĕр валеçĕç. «Çеçпĕл», «Мир Луксор», «Атăл», «Синема-5» кинотеатрсем, «Каскад» кинокомплекс, «Салют», П.П.Хусанкай тата Трактор тăвакансен культура керменĕсем, ЧР Патшалăх электрон тата кинодокументаци архивĕн кинозалĕ куракансене хаваспах йышăнĕç. Фестиваль кинофильмĕсене хăш-пĕр район центрĕсенче те «çавăрттарĕç».
Фестивалĕн тĕп тĕллевĕ - пур ăрури куракана та хăйсем валли кирлине, чуна çывăххине тупма пулăшасси. Çавăнпа та кунта кашниех хăйне кирлине суйласа илме пултарĕ.
Источник: "Хыпар"