16 апреля 2011 г.
Кăçал та Шупашкарта апрелĕн 26-30-мĕшĕсенче Пĕтĕм тĕнчери кинофестиваль иртĕ. Çавна май Наци библиотекинче йĕркеленĕ пресс-конференцие фестивалĕн художество ертÿçи, программа директорĕ С.Лаврентьев, ЧР культура министрĕн пĕрремĕш çумĕ В.Фошин, культура программисен директорĕ М.Матросов хутшăнчĕç.
Сергей Лаврентьев конкурс программине кĕртнĕ 12 фильм тавра калаçу пуçарчĕ. Вĕсемпе хальлĕхе Чăваш Ен кураканĕ паллашман.
Жюри те халех паллă. Унăн председателĕ – Раççей Кинематографистсен союзĕн членĕ С.Проскурина. Фильмсене çĕр-шыври тата Европăри паллă операторсенчен пĕри А.Антипенко, И.Рубанова критик, киновед, Ш.Абдусаламов художник, актер, режиссер, çыравçă, Н.Седых актриса хак парĕç.
Космоспа çыхăннă картинăсем те илсе килме палăртнă. Ачасене валли "Ералаш" журнал ятарлă кăларăм та хатĕрленĕ.
Конкурса тăратнă ĕçсене "Кинокаскад" кинотеатрта тÿлевсĕр кăтартĕç. "Çеçпĕл", "Мир Луксор", "Атăл" кинотеатрсем, "Синема-5" киноцентр, "Салют", Трактор тăвакансен культура керменĕсем фестивалĕн тĕп вырăнĕсем пулĕç.
Источник: "Пирěн пурнăç"