Майăн 9-мĕшĕнче, Аслă Çĕнтерÿ кунĕнче, районти историпе краеведение музейне çулсеренех Аслă Отечественнăй вăрçă ветеранĕсем тата тыл ĕçченĕсем, уява хутшăннисем пырса кураççĕ.
Çак паллă кун Аслă Çĕнтерÿ тунăранпа 60 çул çитнине халалласа музейра кăçал икĕ экспозици уçăлчĕ. «Яланах стройра» экспозицие вăрçă ветеранĕсене халалланă.
Иккĕмĕш экспозици – хаяр та шелсĕр вăрçă çулĕсенчи хĕрарăмсем çинчен. Вăл – «Паттăрлăх - ĕмĕрлĕхе» ятлă. Унта алла пăшал тытса арçынсемпе юнашар çапăçнă хĕрарăмсем, вăрçă ачисем, 18 çулхисен шăпи, тылра ырми-канми ĕçлесе çĕнтерĕве çывхартнă салтак арăмĕсем çинчен.
Выставка залĕнче вара çак паллă юбилее халалланă «Иртни - çамрăксен чĕрисенче» ятпа ачасен ÿкерчĕкĕсен выставки уçăлнă. Унта Мăн Сĕнтĕрти художество шкулĕн тата Муркашри искусство шкулĕн эстетика уйрăмĕн ачисен ĕçĕсене вырнаçтарнă.
Çĕнĕлĕхсене алла илме
Çак кунсенче Муркашри Централизациленĕ Библиотека системинче библиотекарьсен черетлĕ семинар-канашлăвĕ иртрĕ. Унта çĕнĕлĕхсене пурнăçа кĕртес ыйтусене сÿтсе явнă.
Акă, сăмахран, пĕр ыйтăвĕ Муркашри централизациленĕ библиотека системинчи библиотекарьсене тĕслĕх библиотекăсенче ĕçлеме вĕрентесси çинчен. Кунти ертсе пыракан методист Т. Королькова тĕрлĕ конкурссен положенийĕсемпе паллаштарнă: «Библиотекăри çĕнĕлĕхсене алла илес енĕпе чи пултарулли» республикăри, «Эпĕ вулатăп» темăпа ачасен пĕтĕм Раççейри, суйлавçăсен гражданла право культурине ÿстерме республикăри конкурссем иртеççĕ.
Паттăрлăх урокĕ пулнă
Аслă Çĕнтерÿ тунăранпа 60 çул çитнĕ май культура учрежденийĕсенче тĕрлĕ мероприятисем иртеççĕ. Акă, иртенĕ эрнере Кашмашри библиотекăра «Вĕсен ячĕсем историне кĕрсе юлнă» темăпа паттăрлăх урокне ирттернĕ. Кунтах «Чĕрере асра тытса» кĕнекенсен выставкине йĕркеленĕ. Ольга Семенова библиотекарь 5-8 классенче вĕренекенсене Аслă Отечественнăй вăрçăри паллă событисемпе , районтан кайса герой ятне илнисемпе паллаштарнă. Çамрăк вулавçăсем вăрçă çулĕсенчи «Священная война», «Журавли», «Катюша» тата ытти юрăсене итленĕ, çав çулсене хулалланă сăвăсене вуланă. Паттăрлăх урокĕсем ачасене патриотизмла воспитани парас тĕлĕшпе пысăк пĕлтерĕшлĕ.