30 мая 2012 г.
РЕДАКЦИРЕН. Ăмăртăва ирттерме пулăшнăшăн «Хыпар» Издательство çурчĕ «Энергоприборы и системы», «Гея», «Селеновый дар», «ВТМ», «Рацион», «Энергосервис», «Сĕнтĕр çăкăрĕ», «Заря» «Моргаушавтотехсервис», «Сосновкăри çăкăр завочĕ» ООО директорĕсене А.И.Морозова, Е.Н.Скворцовăна, В.М.Мочалова, П.И.Макарова, О.И.Николаева, В.А.Моисеева, Л.Г.Ильгечкина, П.Т.Терентьева, Л.Д.Дмитриева, М.А.Плотникова, Муркаш чăх-чĕп фабрикин директорне Н.Г.Ванеркина, «КМаТ» фермер хуçалăхĕн ертÿçине М.А.Каликова, Мăн Сĕнтĕр райпо канашĕн председательне Л.П.Майковăна, Мăн Сĕнтĕр райповĕн Шомикри лавккин заведующине С.А.Степановăна, «Нарспи» кафе заведующине В.А.Моисеевăна, «Визит», «Алиса» лавккасен директорĕсене Л.В.Николаевăпа А.С.Портнова, «Передовик» ЯХПК директорне Н.Л.Царева, В.И.Кожановпа А.В.Малышев пайтаçăсене, Муркаш район администрацине, Катькас ял тăрăхĕн пуçлăхне Г.Г.Лебедева, Муркаш лицейĕн директорне Н.Е.Смирнова, В.Т.Моисеев тĕп судьяна, Шомик шкулĕн коллективне /директорĕ - Т.М.Майорова/ тав тăвать. Ĕçĕр ăнса пытăр. Малашне те çыхăну тачă пуласса шанас килет.
Çу уйăхĕн 26-мĕшĕнче Муркаш районĕнчи Шомик шкулĕнче “Хыпар” хаçат никĕслевçи Николай Никольский çуралнăранпа 134 çул çитнине халалласа ирттернĕ ăмăртăвăн сумлă парнисене çĕнсе илессишĕн 150 ытла спортсмен тупăшрĕ. Старт умĕн вĕсене “Хыпар” Издательство çурчĕн директорĕ-тĕп редакторĕ Алексей Леонтьев, Муркаш район администрацийĕн пуçлăхĕ Ростислав Тимофеев, Суд приставĕсен республикăри управленийĕн пуçлăхĕн çумĕ Евгений Макаров, Сосновкăри çăкăр завочĕн директорĕ Михаил Плотников, Катькас ял тăрăхĕн пуçлăхĕ Геннадий Лебедев саламларĕç.
Виталий Моисеев тĕп судья ăмăрту йĕркипе паллаштарсан, Чăваш Республикин Патшалăх гимнне янăраттарсан 6-7-мĕш классенче ăс пухакан арçын ачасем чупу çулĕ çине тухрĕç. Финиша чи малтан Муркаш шкулĕнче вĕренекен Сергей Федоров çитрĕ. Калайкасси шкулĕн хастарĕсем Леонид Даниловпа Вячеслав Ельмешкин 2-мĕшпе 3-мĕш вырăнсене пайларĕç. Тантăш хĕрĕсен йышĕнче те çак шкултах пĕлÿ илекен Анжела Пайкова çĕнтерчĕ. 2-мĕш вырăна - Шупашкар районĕнчи Анат Кĕнер шкулĕн сукмакне такăрлатакан Вероника Антонова, 3-мĕш вырăна Муркаш районĕнчи Мăн Сĕнтĕр шкулĕн хĕрĕ Людмила Енушкова тухрĕç.
8-9-мĕш классенче вĕренекен арçын ачасен тупăшăвĕ те хĕрÿ иртрĕ. Кунта та Калайкасси ачиех маттур пулчĕ - Никита Николаев 1-мĕш вырăн йышăнчĕ. Шатракасси шкулĕн вĕренекенĕ Иван Семенов финиша - 2-мĕш, Калайкасси шкулĕн атлечĕ Евгений Яковлев 3-мĕш çитрĕç. 8-9-мĕш классенче ăс пухакан хĕр ачасен йышĕнче Марина Ивановăна /Калайкасси/ çитекен пулмарĕ. Анастасия Петрова /Мăн Сĕнтĕр/ унран кăшт çеç кая юлчĕ. Калайкасси шкулĕн тепĕр спортсменĕ Лилия Александрова - 3-мĕш вырăнта.
10-11-мĕш классенче пĕлÿ пухакансен тупăшăвне пăхма кăмăллă пулчĕ - ара, кашниех çĕнтерме ăнтăлчĕ-çке. Мăн Сĕнтĕр каччи Александр Петров дистанцие чи малтан парăнтарчĕ. Станислав Ершовпа /Калайкасси/ Алексей Трофимов та /Муркаш/ малтисен йышне кĕме пултарчĕç. Çак ÿсĕмри хĕрсем те çивĕч тупăшрĕç. Тĕлĕнмелле те, каллех Калайкасси пики Анастасия Ксенофонтова çĕнтерчĕ. Ун хыççăн финиша Анна Милютинăпа /Муркаш/ Эльвира Хисамутдинова /Калайкасси/ çитрĕç.
Чупура предприяти-организаци ĕçченĕсем йышлах пулмарĕç пулин те кашниех çĕнтерме талпăнчĕ - хĕрсен хушшинче Елизавета Иванова, Ксения Сергеева тата Алеся Лукьянова /пурте Шупашкарти Н.В.Никольский ячĕллĕ педагогика колледжĕнче вĕренеççĕ/ палăрчĕç. Арçынсенчен вара Суд приставĕсен республикăри управленийĕн Муркаш районĕнчи уйрăмĕнче вăй хуракан Андрей Андреев, Игорь Варламов, Сергей Туритов мала тухрĕç.
“Хыпар” Издательство çурчĕн куçса çÿрекен кубокне вăтам шкулсен хушшинче Калайкассисем тивĕçрĕç. Муркаш тата Мăн Сĕнтĕр шкулĕсем 1-мĕшпе 2-мĕш вырăнсене пайларĕç. Тĕп шкулсен командисен йышĕнче ăмăрту хуçисене - Шомиксене - çитекен пулмарĕ. Шатракасси - 2-мĕш, Салапайкасси /Шупашкар районĕ/ 3-мĕш вырăн йышăнчĕç. Предприятисенчен çĕнтерÿçĕ ятне Муркаш районĕн суд приставĕсем тивĕçрĕç. Чи кĕçĕн атлетсене те парнепе хавхалантарчĕç. Çак ята Оринин шкулĕнче 2-мĕш класра ăс пухакан Даниил Котельниковпа Шомик шкулĕн сукмакне такăрлатакан Валентина Лялина çĕнсе илчĕç. Мала тухнисенчен кашниех парнеллĕ пулчĕ.
Дмитрий МОИСЕЕВ.
Источник: "Хыпар"