05 июня 2009 г.
ÇĔРТМЕ уйăхĕн 2-мĕшĕнче “Салют” культура керменĕнче республика шайĕнчи “Çамрăксем кăтартаççĕ” конкурс çĕнтерÿçисене саламларĕç. Пĕтĕмĕшле унта 50 ытла ĕç тăратнă. Лауреатсене Раççей халăх артистки Светлана Дружинина кинорежиссер, СССР Патшалăх премийĕн лауреачĕ Анатолий Мукасей кинооператор тата ЧР тава тивĕçлĕ художникĕ Игорь Дадиани тав хучĕсемпе чысларĕç. “Чи лайăх социаллă видеоролик” номинацире И.Н.Ульянов ячĕллĕ ЧПУн журналистика факультечĕн студенчĕсем Г.Иштонов, И.Федоров, Е.Ануфриева, Р.Мухаметов, Е.Николаев, “Чи лайăх документлă фильм” номинацире А.Антропов, “Чи лайăх экспериментал фильмĕ” номинацире ЧР Мускав гуманитарипе экономика институчĕн Шупашкарти филиалĕн студенчĕсем Н.Александровпа А.Михайлов, “Чи лайăх юрă-кĕвĕ видеоклипĕ” номинацире В.Толстов, Г.Алексеева, А.Иванова “Çутă çăлтăрсем” ĕçĕпе çĕнтерÿçĕсем пулчĕç. Çамрăксене ЧР культура министрĕ Р.Лизакова, ЧР Вĕрентÿ министерствин çамрăксен политикин управленийĕн пуçлăхĕ О.Ефремова та саламларĕç.
Светлана Дружинина хăйĕн фильмĕсем çинчен каласа кăтартрĕ. Культура керменне пухăннисем унăн “Тайны дворцовых переворотов” циклĕнчи “Завещание императора” картинине курчĕç. Ку ĕçе пурнăçланă чухне режиссерпа ÿкерекен ушкăн архивсенчи литературăна, паллă историксен кĕнекисене нумай тишкернĕ. Шухăша куракансем патне çитерес тесен чылай ĕçлеме тивет çав. С.Дружинина залра çамрăксем ытларах пухăннишĕн хĕпĕртерĕ.
Алексей Мукасей кинооператор Чăваш Ене ырă та тарават çынсем пурăннишĕн юратать. “Фильмсене пăхнă чухне камера хыçĕнче оператор пулнине ан манăр”, - терĕ вăл.
Циклти “Виват, Анна Иоановна” фильма ÿкернĕ чухне И.Дадиани художник хутшăннă, вăл актерсен тумтирне чăваш эрешĕсемпе илемлетнĕ.
Паян Хĕрлĕ лапамра - асăннă кинофильм премьери.
Источник: "Çамрăксен хаçачĕ"