19 марта 2013 г.
Кăçалхи февралĕн 25-мĕшĕнчен тытăнса мартăн 25-мĕшĕччен Трак енри шкулсенче вĕренекенсем валли "Профессиональный компас" ятлă профориентаци уйăхлăхĕ пырать.
Шкулсенче вĕренекен хĕрсемпе каччăсем умĕнче професси суйласа илес ыйту яланах çивĕч тăрать, малашне те çаплах пулĕ. Хăйĕн малашлăхĕ пирки шухăшласа кашни вĕренекенех чи малтан пулас професси пирки пуçне çĕмĕрет. Ĕçпе тивĕçтерекен центрăн профконсультанчĕ уйăхлăх вăхăтĕнче пĕтĕмĕшле пĕлÿ паракан вĕренÿ учрежденийĕсемпе килĕшсе татăлса кунти 9 тата 11-мĕш классемпе вырăна тухса профориентаци занятийĕсем ирттерет. Вĕренекенсем вара профессисен тĕнчи пирки, республикăри вĕренÿ заведенийĕсем çинчен тулли хурав-информаци илеççĕ, ĕç рынокĕнчи лару-тăрупа паллашса ăна тишкереççĕ. Çакăнта тĕрлĕ мелсемпе усă куратпăр, строитель профессийĕ çинчен видеофильмсем кăтартатпăр. Пирĕн профконсультант каччăсемпе хĕрсене професси суйласа илес çĕрти вăрттăнлăхсемпе, çамрăксем час-часах тăвакан йăнăшсемпе, ĕçпе тивĕçтерекен центр çул çитменнисене паракан çăмăллăхсемпе паллаштарать.
Источник: "Ял пурнăçĕ" (Красноармейская районная газета)