28 октября 2014 г.
Ĕç шырасси — хăй заняти, вăл сахал мар вăй тата вăхăт ыйтать. Паянхи ĕç рынокĕнчи лару-тăру ĕç шыракансене пуçаруллă тата куçăмлă пулма хистет, ĕç паракансене вара — яваплă та ĕçлĕхлĕ. Ĕçпе тивĕçтерекен органсем йĕркелесе ирттерекен вакансисен ярмарккинче çынсем ĕç рынокĕнчи лару-тăрупа, психолог канашĕсемпе паллашаççĕ, ку енĕпе патшалăх паракан çăмăллăхсем пирки информаци илеççĕ, ĕç паракансем хăйсен пулас ĕçченĕсем умне лартакан ыйтусемпе интересленеççĕ, предприятисемпе организацисенчи кадрсен службисен çыннисемпе сăмахлаççĕ. Нумаях пулмасть пирĕн центрта вакансисен черетлĕ ярмарки иртрĕ. Унта “Стройводмонтаж”, “Скороход” ОООсен, Л. М. Петров уйрăм предпринимателĕн ертỹçисем, Красноармейскипе Еншик Чуллă вăтам шкулĕсен яваплă çыннисем хутшăнчĕç. Вакансисен ярмарккинче ĕç паракансем çакăн пек специальноçсемпе вакансисем сĕннĕ: кассир, сутуçă, повар, çĕвĕç, служба пỹлĕмĕсене тасатакан, тĕрлĕ ĕçсем тăвакан тата ыт. те. Вакансисен ярмарккине 14 çын хутшăнчĕ. Ĕç шыракан 11 çын анкетăсем çырчĕ, икĕ çын ĕç паракансемпе малалла калаçăва тăсĕ. Çав кун асăннă мероприятие килнисем вакансисен ярмарккине хутшăннă предприятисемпе организацисенчи ĕç условийĕсемпе, ĕç укçин хисепĕпе паллашма пултарчĕç. Пирĕн центр специалисчĕсем ĕç шыракансене ĕç рынокĕнчи лару-тăру çинчен, районти предприятисемпе организацисенчи вакансисем пирки каласа кăтартрĕç. Д. Захарова
Источник: "Ял пурнăçĕ" (Красноармейская районная газета)