29 января 2013 г.
Вакансисен пĕрремĕш ярмаркинче
29.01.2013
Г. Борзин
Оригинал изображения
Январĕн 21-мĕшĕнче "ЧР халăха ĕçпе тивĕçтерекен патшалăх службин Красноармейски районĕнчи халăха ĕçпе тивĕçтерекен центрĕ" хысна учрежденийĕнче вакансисен кăçалхи пĕрремĕш ярмарки иртрĕ.
Вакансисен черетлĕ ярмаркине "Агрохолдинг "Юрма" ОООн представителĕ С. В. Исаева хутшăнчĕ. Асăннă педприятие нумайăшĕ "Лапсарти чăх-чĕп фабрики" ятпа пĕлеççĕ. Светлана Валерьевна предприяти ĕçĕ-хĕлĕпе, ĕç условийĕсемпе, ĕç укçи калăпăшĕпе паллаштарчĕ, производство цехĕсене пысăклатнă май ĕç вăйĕ кирлине палăртрĕ. Паян кунти цехсене слесарь-операторсем, слесарь-юсавçăсем, слесарь-сантехниксем, оператор-селекционерсем, чăх-чĕп пăхакансем, рабочисем, контролерсем, трактористсем, электриксем, штукатур-малярсем, мастер-наладчик, автоэлектрик, электрогазосварщик, ытти професси çыннисем кирлĕ. Кунта пилĕк кунлă ĕç эрнипе тата вахта мелĕпе вăй хума май пур.
Вакансисен черетлĕ ярмаркине Мăн Шетмĕ тăрăхĕнчи (Йĕпрем, Пăрăнтăк, Анаткас) ĕçсĕр тăрса юлнă, ĕçпе тивĕçтерекен центрта учетра тăракансем (20-е яхăн çын) хутшăнчĕç. Ку ялсенчи çынсем предприяти автобусĕпе (ирхине ялсенчен ĕçе илсе кайма, каçхине предприятирен леçсе яма) ĕçе çÿреме килĕшсе татăлчĕç.
Источник: "Ял пурнăçĕ" (Красноармейская районная газета)