18 ноября 2011 г.
Халăха ĕçпе тивĕçтерекен патшалăх служби укçа-тенкĕпе пулăшнипе Трак енри чылай çын харпăр хăйĕн ĕçне уçма май тупрĕ.
Çав шутра Красноармейскинчи Л. Батракова та. Людмила Анатольевна, çав пулăшупа усă курса, пĕлтĕрхи февралĕн 25-мĕшĕнче газ уçлакан станцире ĕçлекенсем пурăнакан микрорайонта — Ленин урамĕнчи 91-мĕш çуртра парикмахерски уçма пултарнă.
— Патшалăх уйăрнă укçа-тенкĕпе ĕç вырăнĕнче кирлĕ креслосем, туалет сĕтелĕсем, пĕчĕк шкафсем, çавăн пекех çÿç касмалли машинкăсем , фенсем тата кирлĕ ытти хатĕрсене туянтăмăр, — каласа парать вăл.
Иртнĕ çулхи августăн 12-мĕшĕнчен кунта хушма тепĕр ĕç вырăнĕ туса хунă. Заведующисĕр пуçне кунта халĕ Лариса Андреевапа Алина Никитина парикмахерсем те тăрăшаççĕ. Пĕрремĕшĕ ку специальноçпа 13, тепри 7 çул вăй хураççĕ. Людмила Анатольевна вара çак профессине аслă классенче вĕреннĕ чухнех алла илнĕ, унпа 15 çул ĕнтĕ юратнă ĕçре тимлет.
Ĕç пÿлĕмĕ ытла пысăках мар пулин те, унта таса та çутă. Пĕр сăмахпа, клиентсене йышăнма пур условисем те тивĕçеççĕ. Вĕсем вара кунта килсех тăраççĕ, ялан çÿрекенсем те чылайăн. Ĕç кунĕ те меллĕ вĕсемшĕн.
Парикмахерски вырсарни кунсемсĕр пуçне апат вăхăчĕсĕр куллен ĕçлет: ирхине 8 сехетрен тытăнса каçхине 19 сехетчен, шăмат кунсенче — 8-тан 14 сехетчен. Хаксем те çав тери пысăках мар: арçынсен çÿç кастарма 100, хĕрарăмсен 110 тенке ларать.
Источник: "Ял пурнăçĕ" (Красноармейская районная газета)