05 августа 2011 г.
“ЧР халăха ĕçпе тивĕçтерекен патшалăх службин Красноармейски районĕнчи халăха ĕçпе тивĕçтерекен центрĕ" патшалăх учрежденийĕ те августăн (çурла уйăхĕн) 1-мĕшĕнчен пуçласа ĕçсĕр юлнă тесе палăртнă граждансене пирвайхи майпа электронлă енпе патшалăх енĕпе çăмăллăхĕсем парать.
Пирĕн центр ярса панă электронлă почта çырăвĕ пулăшнипе çыннăн йышăнăва çырăнма, тест витĕр тухма, обществăлла ĕçе хутшăнас пирки заявлени пама, ытти электронлă тулли çăмăллăхсем илме пулать. Пĕртен пĕр услови — заявлени панă çыннăн, электронлă цифрăллă алă пусни (цифровая подпись) пулсан пысăках мар укçа тÿлесе "Ростелеком" урлă илме май пур. Çакăн евĕр алă пусни пулсан ĕçпе тивĕçтерекен центра килсе хăвăн пушă вăхăтна та çухатмастăн, килтен тухмасăрах тивĕçлĕ çăмăллăхсем илетĕн.
Электронлă енпе чи пирвайхи çăмăллăхсем парасси хамăрăн центрăн чи пирвайхи тивĕçĕ шутланать, ку пирĕн тĕп витĕм пулса тăрать те.
2012 çулхи август уйăхĕччен ЧР Министрсен Кабинечĕн йышăнăвĕпе республикăри мĕн пур ĕç тăвакан власть органĕсене электронлă майпа патшалăх çăмăллăхĕсем пама хушнă.
Чи малтан электронлă майпа çакăн евĕр çăмăллăхсем памалла: тÿлевлĕ обществăлла ĕçсене хутшăнас пирки заявленисене йышăнасси тата кун евĕр ĕçсене хутшăнасси çинчен информаци тăратасси; 14—18 çулсенчи каччăсемпе хĕрсене вĕренÿрен пушă вăхăтра,18— 20 çулсенчи ĕçсĕр, нумаях пулмасть вĕрентÿ учрежденийĕсенчен пĕлÿ илсе тухнисене, ытти çынсене (вĕсем ĕç шыравĕнче йывăрлăх тÿсеççĕ пулсан) вăхăтлăха ĕçе вырнаçтарасси пирки заявленисем йышăнасси; граждансене тивĕçлĕ ĕç тупса парас пирки пулăшас, ĕç паракансене тивĕçлĕ ĕç вырăнĕсем тупса парас пирки; вакансисене тупса парса вырнаçтарас кандидатурăсем пирки; професиллĕ ориентаци йĕркелес çĕрте граждансенчен заявленисем пухасси тата ыт . те.
Паянхи вăхăтра Чăваш Енти халăха ĕçпе тивĕçтерекен патшалăх службин тĕп учрежденийĕнче ĕçсĕр тăрса юлнă çынсене электронлă майпа чи малтан патшалăх çăмăллăхĕсем парас енĕпе вăхăтлăх йĕрке туса хурса çирĕплетнĕ. Çавна май пирĕн çынсемпе организацисем, электронлă алă пуснисемлисем, электронлă майпа патшалăх çăмăллăхĕсем илме пултараççĕ. Çавна май вĕсен анкета çырса хатĕрлемелле. Вăл вара ЧР патшалăх çăмăллăхĕсен порталĕ, пирĕн учрежденин сайчĕ çинче пур. Ун хыççăн асăннă анкетăна гражданинăн электронлă почтăпа халăха ĕçпе тивĕçтерекен центра тăратмалла. Унăн кăтартăвĕсене вара пирĕн çын электронлă майпа илме пултарать.
Источник: "Ял пурнăçĕ" (Красноармейская районная газета)