26 марта 2010 г.
Тивĕçлĕ те пур енлĕ пурăнма, обществăн тулли праваллă гражданинĕ пулнине туйса тăма пире кашнинех юратнă тата чуна çывăх ĕç кирлĕ. "Ĕç çĕклет, ÿркев ÿкерет", — тенĕ ĕлĕкех.
Анчах юлашки çулсенче Трак енри çынсенчен чылайăшĕ ку тĕлĕшпе йывăрлăха кĕрсе ÿкрĕ — ĕçсĕр тăрса юлчĕ. Пирĕн патшалăх учрежденийĕ те çакăн евĕр çынсене пулăшма тĕрлĕ мелсем шырать.
Ĕç рынокĕнче ыйтакан професси çук е квалификаци çителĕксĕр çынсене эпир тÿлевсĕр курссене яма тăрăшатпăр. Ĕçсĕррисем валли йĕркеленĕ "Ĕç шыракансен клубĕн" пĕлтерĕшĕ те пысăк. Унпа усă курса йывăрлăха лекнĕ çынсене ĕç рынокĕнче ăнăçлă тупăшма кирлĕ хăнăхусем илме май туса паратпăр.
Тепĕр питĕ пĕлтерĕшлĕ пулăм — ĕçсĕррисене психологи пулăшăвĕпе тивĕçтересси. Паянхи кун çынсемпе ĕçлеме пĕртте çăмăл мар, кашнин кăмăлĕ, чун туртăмĕ, шухăшлавĕ хăйне евĕр. Пурне те кăмăллăн йышăнатпăр, калаçатпăр, ăнлантаратпăр, юрăхлă вариантсем тупма тăрăшатпăр.
Юлашки çулсенче хамăр ĕçре усă куракан тепĕр мел — вакансисен ярмаркине ирттерни. Пуш уйăхĕн иккĕмĕш вунă кунлăхĕнче ĕçсĕррисем пирĕн учрежденин информаци пÿлĕмне пухăнчĕç. Вĕсем умĕнче И. Козлов ертÿçĕ тухса калаçрĕ. Вакансисен ярмаркинче ĕçсĕррисене çак специальноçсене сĕнчĕç: парикмахер, повар-кондитер, "Д", "Е" категориллĕ водитель, штукатур-маляр-плиточник, котельнăй операторĕ, электромонтер, ял хуçалăх производстви валли "С", "Е" категориллĕ тракторист-машинист.
Вакансисен ярмаркине хутшăннă ĕçсĕр 20 çынран 15-шĕ тÿлевсĕр курссенче вĕренме кăмăл турĕ.
Источник: "Ял пурнăçĕ" (Красноармейская районная газета)