11 июня 2015 г.
Иртнĕ кунсенче Комсомольски районĕнчи ĕçпе тивĕçтерекен центрта вакансисен ярмăркки пулчĕ. Унта ĕçсĕррисене Комсомольскинчи РСУ, Çĕрпỹелĕнчи, Тăманлă Выçлири кирпĕч завочĕсем, "Асаново" ЯХПК, "Стройсервис" ООО, "Комсомольские овощи" агрофирма, Васильевăн хресченпе фермер хуçалăхĕ, З.Н.Истратий ИП сĕнекен вăхăтлăх 60 ĕç вырăнне йышăнма сĕннĕ
Ярмăрккăна çул çитмен 48 çамрăк хутшăннă. Ачасене ĕç условийĕсемпе, тỹлев виçипе паллаштарнă. Çавăн пекех малашлăха валли професси суйласа илме пулăшас тĕллевпе те ятарлă сĕнỹсем панă. Мероприяти хыççăн çул çитмен 45 ача вăхăтлăх ĕçе вырнаçрĕ.
Çуллахи каникул вăхăтĕнче ĕçлес кăмăллă çамрăксене районти ĕçпе тивĕçтерекен центрта кĕтетпĕр. Пирĕн адрес: Комсомольски ялĕ, Завод урамĕ, 29-мĕш çурт.
Г.ВОРОНОВА,
директор.
Источник: "Каçал Ен"