11 октября 2019 г.
Çирĕп çемьере çитĕнекен ача активлăхпа палăрать, телейлĕ пулать. Мăшăрлану пулăмне ăнланма, çемье институтне хисеплеме хăнăхтарас тĕллевпе районти ЗАГС пайĕнче ĕçлекенсем аслă классенче вĕренекенсемпе урок ирттернĕ.
Тăвайри вăтам шкулти 9 «а» класра вĕренекенсем çемье воспитанийĕн азбукипе паллашнă. ЗАГС пайĕн начальникĕ В.Новикова çемье пĕлтерĕшĕпе функцийĕсем çинчен каласа кăтартнă. Çемье пурнăçĕнче ачасене лайăх воспитани парасси тĕп тĕллев пулнине палăртнă. Вĕренекенсем ĕçлĕ вăйăра туслă тата çирĕп çемье модельне ăсталанă.
Телейлĕ çемье пурнăçне йĕркелеме нумай ĕçлемелле. Лайăх арăм е упăшка пулма çăмăл мар. Çĕршывăн çамрăк гражданĕсен шкулта вĕреннĕ чухнех çирĕп кил-йыш чăмăртас тесен мĕнле пурăнмаллине пĕлмелле тесе шутлаççĕ ЗАГС пайĕн специалисчĕсем.
Источник: "Ял ĕçченĕ"