26 июля 2019 г.
Канашри «Локомотив» стадионра картишсенчи футбол командисем вылярĕç нумаях пулмасть. Сĕнтĕрвăрри, Канаш, Комсомольски, Красноармейски, Тăвай, Патăрьел, Елчĕк, Вăрмар, Шăмăршă районĕсенчи çамрăксем хутшăнчĕç унта.
Çамрăк спортсменсене футбол уйĕнче ăнăçу суннă малтан, ЧР физкультурăпа спорт министерствипе «Единая Россия» партин регионри уйрăмĕ хатĕрленĕ сертификат панă кашнине.
Вăйăсем иртнĕ хыççăн республикăри финала хутшăнма Тăвай ен каччисемпе (сăн ӳкерчĕкре) Сĕнтĕрвăрри районĕн хĕрĕсем тивĕçлĕ пулнă. Картишсенчи чи вăйлă футбол команди Шупашкарта çурла уйăхĕн вуннăмĕшĕнче паллă пулать.
Источник: "Ял ĕçченĕ"