07 марта 2019 г.
Пĕтĕм Раççейри «Мини-футбола - шкула» проекта хутшăнса Тăвай шкулĕнчи çамрăк футболистсем (2005 çулта çуралнисен ÿсĕмĕнче) районта мала тухса Етĕрнере иртнĕ регион ăмăртăвĕсене хутшăнма тивĕç пулчĕç. Республикăри вăйлă командăсене парăнтарса тăвайсем Чăваш Ен чемпионĕ- сем пулса тăчĕç, Атăлçи округĕн- че республика чысне хÿтĕлерĕç.
Пĕтĕмĕшле пĕлÿ паракан вĕренÿ организацийĕсем хушшинчи Пĕтĕм Раççейри мини-футболла выляссипе III тапхăр ăмăртăвĕсем нарăсăн 23-28-мĕшĕсенче Чулхула облаçĕнчи Городецки районĕнче иртрĕç.
Раççей субъектĕнчи тупăшăва 12 команда хутшăнчĕ. Тăвайсен ушкăнĕнче Мордови тата Оренбург командисем пулчĕç, 13 çулхи шкул футболисчĕсем хушшинче 2-мĕш вырăн йышăнчĕç вĕсем. Çакăн хыççăн Пермь хулипе Мари Эл командисемпе тĕл пулчĕç, вăйăсене выляса ярса саккăрмĕш вырăна тăрса юлчĕç.
Атăлçи округĕнчи ăмăртусенче республика чысне Тăвай районĕнчи ял ачисем хÿтĕ- леме тивĕç пулни хăех пысăк чыс. Вăйлисемпе тупăшни, вĕсенчен ăсталăха вĕренни малашне пысăк çитĕнÿсем патне çул хывма пулăшĕ. Çамрăксен командине инçе çула тухма пулăшнă спорт ветеранĕсене - Сергей Петровпа Александр Захарова (иккĕшĕ те Тĕмер ялĕнче çуралнă), «Аль» ФСК директорне Анатолий Кириллова тав сăмахĕ калатпăр.
Источник: "Ял ĕçченĕ"