20 сентября 2017 г.
Вăхăт питĕ хăвăрт шăвать, акă çитмĕле те çитрĕмĕр. Шкулта хамăр вĕреннĕ, учитель пулса ĕçленĕ çулсем аса килеççĕ. Лайăх кăмăллă, пурнăçри тÿрĕ çул-йĕрпе утакансем ачасене савăнăç кăна парнелеççĕ. Хамăр вĕрентнĕ ачасем халĕ те асра. Вĕсем те хăйсем хыççăн ырă йĕр хăвараççĕ.
Акă, Елена Николаевна Матросованах илер. Вăл учитель пулса Тăрмăшри шкулта нумай вĕрентрĕ. Çав вăхăтрах чăваш юррисене çынсем патне çитерсе мĕн чухлĕ савăнтармарĕ-ши; Маншăн вăл - чи çывăх ачасенчен пĕри. Харсăрскер лара-тăра пĕлмест, хăйĕн çепĕç сассипе тыткăнлать. Хăй йĕри-тавра ăнланакан, хисеплекен, пĕр-шухăшлă коллектив йĕркелесе Тăрмăш ялне, район чысне çÿ-ле çĕклерĕ, чăн-чăнах пысăк чыса тивĕçлĕ тесе калас килет. Хăйĕнпе калаçнă чухне те мăнаçлă тытмасть, кашни çынна çепĕç чĕлхипе тыткăна илет, хăй патне магнит евĕр туртать. Ленăпа çавăн пекех Зоя Кадикинана та танлаштарас килет. Зоя та ?халĕ Григорьева/ нумай çынна пурнăçра ырă тăвать. Кăмăлĕ унăн - çынсемшĕн, халăхшăн. Вăл çынсем умĕнче ытлашши палăрма юратмасть.
Çав вăхăтрах Енĕш Нăрваш ялĕнче миçе çынна вилĕмрен хăтаракан, çăлакан медсестра яланах асра. Ку вăл - пирĕнпе кÿршĕри Ирина Алексеевна Иванова. Çитмĕле çитнĕ май чирсем те нумайланчĕç. Час-часах укол тумасан, вилĕмпе кĕрешме питĕ йывăр. Мана вилĕмрен çăлма çĕрле те, тăманра та çитме хатĕр Ирина. Çынсем те ăна ырăпа асăнаççĕ. Пурте ăна ырлаççĕ. Елена Николаевнапа Ирина Алексеевнана юнашар тăратса калаçтарас килет питĕ. Пĕри музыкăра, тепри медицинăра телей тупрĕç.
Источник: "Ял ĕçченĕ"