Публикации » Районти шкулсен кăларăм каçĕсенче

07 июля 2017 г.

Тăвай енре çамрăксен кунне тĕрлĕ майпа паллă тăвасси йăлана кĕнĕ. Çĕртме уйăхĕн вĕçĕнче Тăвайри вăтам шкултан вĕренсе тухакансен кăларăм каçĕ пулнă. Пурĕ 47 хĕрпе каччă патшалăх тĕрĕслевĕ витĕр ăнăçлă тухнă. Капăр тумлă хĕрсемпе каччăсем “Выпускник-2017” тесе çырнă хăюсем çыхнă. Вĕсем çинчен куç илес те килмест.
Юлия Иванова çамрăк юрăç чăвашла юрăсем шăрантарчĕ малтан. Шкул директорĕ Вера Кириллова ăшшăн саламларĕ пухăннисене çамрăксен кунĕ ячĕпе. Чи малтанах медальпе вĕренсе тухакан 11 çамрăка хĕрлĕ хуплашкаллă аттестат пачĕ. Унтан вĕсен ашшĕ-амăшĕсене Тав çырăвĕсемпе чысларĕ Вера Михайловна.
Çавăн пекех çамрăксене Тăвай ял тăрăхĕн пуçлăхĕ Николай Сормов, вĕрентÿ пайĕн начальникĕн заместителĕ Ирина Семенова, класс ертÿçисем Надежда Гавриловапа Ирина Порфирьева учительницăсем, Тăвайри культура çурчĕн директорĕ Арина Алексеева ăшшăн саламларĕç, вĕсене пурне те чĕрĕ роза чечекĕсем парса тав турĕç. Унтан район центрĕ-нчи Мухтав Монуменчĕ умне чечексен кăшăлĕ хучĕç выпускниксем. Аслă пурнăç çулĕ çине тухакансем Тăван çĕршывăн Аслă вăрçинче паттăррăн çапăçса пуçне хунисенчен малашлăх валли ырă пехил ыйтнăнах туйăнчĕ.
Уяв малалла “Çамрăклăх” кафере тăсăлнă.

Источник: "Ял ĕçченĕ"