09 июня 2017 г.
Кашни çулах эпир Тушкилти ача садĕнчи аслă ушкăна çÿренисене шкул сукмакки çине ăсататпăр. Кăçал вĕсем вунтăваттăн пулчĕç. Ачасем кунта туслă выляса ÿснисĕр пуçне шутлама, вулама тата çырма, юрлама, ташлама хăнăхаççĕ, садикре пулса иртекен тĕрлĕ-рен мероприятисене хастар хутшăнаççĕ, районти конкурссенче те хăйсен пултарулăхне кăтартаççĕ. Акă, Çĕнтерÿ кунне халалланă “Живи и помни” конкурсра “Солнышко” ушкăнри Юлия Иванова, Ксения Георгиева, Диана Александрова, Арсений Игнатьев, Дарья Семенова иккĕмĕш вырăн йышăнса грамотăна тивĕçрĕç.
Сывпуллашу кунĕнче ачасем юрăсем шăрантарчĕç, ташларĕç, кунта ĕçлекенсен ячĕпе ырă сăмахсем каларĕç. Уяв вĕçленсен урама тухса шарсем вĕçтерчĕç, вĕсен вĕçне хăйсен ĕмĕчĕсене çырса хутран каснă кăвакарчăнсем çыхса ячĕç.
Ачасем - пирĕн пуласлăх, çавăнпа та вĕсем сывлăхлă та пултаруллă çитĕнччĕр тесе кунти ĕçченсем куллен вăй-халне шеллемеççĕ.
Источник: "Ял ĕçченĕ"