13 января 2015 г.
Елена Неофитова Тăвайри вăтам шкулăн 11-мĕш класĕнче вĕренет. Пĕрремĕш учительници - Л.Г.Ильина. Класс ертỹçи - Чăваш Республикин тава тивĕçлĕ вĕрентекенĕ А.П.Михайлова. Амăшĕ Наталья Николаевна Тăвайри вăтам шкулта математикăпа информатика вĕрентет, ашшĕ Андрей Неофитов район тулашне ĕçлеме çỹрет.
Класри 17 вĕренекенрен улттăшĕ отличник, вĕсенчен пĕри - Лена. 5-мĕш класранах вăл шкулти "Çут çанталăкăн çамрăк хỹтĕлевçисем" кружок членĕ. Чи юратакан предметсем биологипе хими. Пирвайхи тĕпчев ĕçне пуçламăш класрах пуçăннă. Районти, республикăри, Пĕтĕм Раççейри олимпиадăсен, наукăпа практика конференцийĕсен участници, призер, çĕнтерỹçĕ. 9-10 классенче 2 хутчен Пĕтĕм Раççейри экологи олимпиадине хутшăннă, 2013_2014 вĕренỹ çулĕнче çĕнтерỹçĕ пулса тăнă. Кăçал кĕркунне хăйĕн вĕрентекенĕпе А.П.Михайловапа Ярославль хулине Пĕтĕм Раççейри "Раççейĕн пулас интеллект ертỹçисем" форума кайса килнĕ. Çĕр-шывăн 85 регионĕнчен 530 талантлă вĕренекенпе (Пĕтĕм Раççейри олимпиадăсемпе тĕнчери конкурссен çĕнтерỹçисем, сайра тĕл пулакан изобретенисен çамрăк авторĕсемпе патент илме тивĕçнисем) 168 педагог хутшăннă унта. Участниксене РФ Президенчĕ Владимир Путин саламланă. Вĕренекенсем çĕр-шыври паллă çынсемпе, çав шутра Совет Союзĕн тата Раççей Геройĕпе Сергей Крикалев летчик-космонавтпа, Раççей Правительствин чи çамрăк министрĕпе Николай Никифоровпа, паллă ăсчахпа, Арктикăпа Антарктика тĕпчевçипе Артур Чилингаровпа, Владислав Паченко академикпа, Мускаври архитектура институчĕн ректорĕпе тата Раççейри Художество академийĕн вице-президенчĕпе Дмитрий Швидковскийпе, ытти паллă çынсемпе тĕл пулнă. Çамрăксене Тĕнчери космос станцийĕн бортĕнчен Максим Сураев, Александр Самокутяев тата Елена Серова летчик-космонавтсем видеотрансляци урлă саламласа ăнăçусем суннă. Ачасем тĕрлĕ ăслăлăхри ертсе пыракан экспертсемпе тĕпчевçĕсен лекцийĕсене итленĕ, вĕсемпе тỹрремĕн калаçăва кĕрсе тем тĕрлĕ кăткăс ыйтăва та сỹтсе явма пултарнă. Ачасене техникăри, наукăри открытисем, вĕсем пуласлăх çине мĕнле витĕм кỹресси кăсăклантарнă. Çамрăк интеллектсен тĕпчевĕсем ултă темăпа - "Çын", "Общество", "Çĕр", "Космос", "Хула" тата "Сетьсем" - иртнĕ. Лена "Хула" кластера хутшăннă. Юлашки кунне ачасем "Пысăк вăйăра" хăйсем тăратнă проектсене хỹтĕленĕ. Чи харсăррисене тĕрлĕ номинацире дипломсемпе палăртнă. Тăвай хĕрĕ Елена Неофитова та "Пултарулăхри çутă хавхашăн" номинацире Совет Союзĕн Геройĕн, тĕнчери пĕрремĕш хĕрарăм летчик-космонавт Валентина Терешкова аллинчен диплом илме тивĕçнĕ.
-Умра - Çĕнĕ çул, саншăн вăл пуласлăха пăхакан шанăçсен çулталăкĕ пулĕ. Шкултан вĕренсе тухсан, вăрттăнлăх мар тăк, эсĕ кам пуласшăн? - ыйту патăм ăна.
-Врач, пĕр çавă çеç. Мĕншĕн тесен çынсене пулăшасси, сыватасси - маншăн чи пархатарлă професси. Пирĕн йăхра сывлăх хуралçисем унччен те пулнă. Унсăр пуçне манăн чирлĕ шăллăма çав тери пулăшас килет, - хуравларĕ Лена.
Ĕмĕтỹсем чăннипех çутă, çăмăл мар вĕçевре çунатусем çирĕп пулччăр. Çĕнĕ çулпа сана!
И.СОЛОВЬЕВ.
Источник: "Ял ĕçченĕ"