21 января 2014 г.
Çак кунсенче Чÿкçырминчи хоккей площадкинче районăн уçă ăмăртăвĕсем пуçланчĕç.
Тăвай çамрăкĕсем тушкилсене 8:3 тата тăрмăшсене 5:1 шутсемпе парăнтарчĕç. Вăрманхĕррипе Чÿкçырмин пĕрлештернĕ команди Тăвай районĕн ентешлĕхĕн хоккеисчĕсенчен вăйлăрах пулчĕ (5:3). Ентешлĕх команди Тăвайри вăтам шкулта вĕренекен Вăрманхĕррипе Чÿкçырми çамрăкĕсенчен те çухату тÿсрĕ (1:2). Вăрманхĕррисемпе чÿкçырмисен пĕрлештернĕ команди Тăвай шкулне 5:2 шутпа çĕнтерчĕ. Çĕнтерÿçĕ-командăна кубокпа, мала тухнисене дипломсемпе тата медальсемпе хавхалантарнă.
Вăрманхĕррипе Чÿкçырми ялĕсенчен Тăвайри вăтам шкула çÿрекен çамрăксем район чысне республикăра та хÿтĕлеççĕ. Акă вăтам ушкăнра вĕренекенсем республикăри спартакиадăна ăнăçлă хутшăнаççĕ, I–VI вырăнсемшĕн кĕрешеççĕ. Тĕп ушкăнри ăмăртусем вара çитес уйăхра пуçланаççĕ.
Чÿкçырминчи хоккей коробкинче кашни вырсарни кун тĕрлĕ ăмăртусем, уçă турнирсем пулаççĕ. Кăмăл пулсан вĕсене ытти ялсен çамрăкĕсем те хутшăнма пултараççĕ.
В.ИВАНОВ.
Источник: "Ял ĕçченĕ"