18 сентября 2012 г.
Енĕш Нăрваш ялĕнчи “Теремок” ятлă ача сачĕн юбилейĕ пулчĕ нумаях пулмасть.
Ăна “Красная Чувашия” ЯХПК 1987 çулта кĕркунне тунă. 25 çул хушшинче ача сачĕ чылай улшăннă, пĕчĕккисем унта юратсах çÿреççĕ. Вăхăт хăвăрт иртет. Нумаях пулмасть кăна ача сачĕ пуçласа йышăннăччĕ пек пĕчĕк çынсене. 25 çул иртрĕ унтанпа, пуçласа ача садне кайнисем çемьеленнĕ те ĕнтĕ.
Луиза Николаевна Павлова, Людмила Васильевна Евдокимова, Луиза Васильевна Лукина, Мария Георгиевна Васильева воспитательницăсем ача сачĕ ĕçлеме пуçланăранпах кунта вăй хураççĕ. Вĕсене Галина Васильевна Кузьмина, Алина Григорьевна Николаева, Валентина Ивановна Ефимова пулăшаççĕ. Галина Васильевна Васильевапа Лариса Владимировна Ефимова поварсем ачасене тутлă апатпа савăнтараççĕ. Валентина Васильевна Данилова таса вырăн çивиттисемпе тивĕçтерет пĕчĕккисене. Ирина Григорьевна Алексеева медсестра ачасен сывлăхĕшĕн тимлет. Алевтина Геннадьевна Елизарова музыкçă ачасене юрлама-ташлама хăнăхтарать. Ирина Васильевна Герасимова завхоз, Зоя Ивановна Ивановапа Ирина Валериановна Лукина хуралçăсем ачасене кунта лайăх пултăр тесе тимлеççĕ. “Теремокри” 3 ушкăна 58 арçын ачапа хĕр ача хĕпĕртесе çÿреççĕ. Воспитательсен тăрăшулăхĕнчен те килет ку.
Юбилей ячĕпе ача садĕнче концерт пулчĕ. Уявра район администрацийĕн пуçлăхĕн çумĕ, вĕрентÿ пайĕн начальникĕ В.Шакров, Енĕш Нăрваш ял тăрăхĕн пуçлăхĕ В.Петров, Енĕш Нăрвашри вăтам шкул директорĕ Г.Степанова, Тăрмăшри ача сачĕн заведующийĕ Н.Ершова, ялти информаципе культура центрĕн ĕçченĕсем тата ачасен ашшĕ-амăшĕсем пулчĕç, ăшă сăмах каларĕç, парнесем пачĕç.
Ачасем аслисене ташласа, сăвă каласа, юрласа савăнтарчĕç. Енĕш Нăрвашри информаципе культура центрĕн ĕçченĕсем хăйсен кĕçĕн тусĕсене юрă парнелерĕç. “Теремок” ача садне Енĕш Нăрваш ял тăрăхĕн администрацийĕ юбилейĕпе ăшшăн саламлать, пĕчĕккисене куллен тÿпери çутă çăлтăрсем патне ăнтăлма сĕнет, ĕçлекенсене ăнăçусем сунать.
Источник: "Ял ĕçченĕ"