18 сентября 2012 г.
Хăй вăхăтĕнче район администрацийĕнче, унтан Элпуçĕнчи вăтам шкул директорĕнче ĕçленĕ Владимир Геннадьевич Груздева асăнса тăван тăрăхĕнче çулленех футбол ăмăртăвĕсем иртеççĕ. Ку вăл йăлана кĕнĕ ĕнтĕ, пурнăçран питĕ ир уйрăлса кайнă Владимир Геннадьевича çынсем асрах тытаççĕ.
Çапла иртнĕ шăмат кун та, авăн уйăхĕн 15-мĕшĕнче, Владимир Геннадьевича асăнса черетлĕ футбол ăмăртăвĕсем пулчĕç. Вăйăсем Элпуç шкулĕн площадкинче иртрĕç. Унта тăватă команда – Элпуçĕнчи вăтам шкулта вĕренекенсен, Çĕнçырма ялĕнчи çамрăксен, Элпуçĕнчи çамрăксен тата ветерансен командисем хутшăнчĕç. Туслă та çивĕч кĕрешÿре иртрĕç асăну вăййисем. Кубока Элпуçĕнчи – В.Г.Груздевăн тăван ялĕнчи çамрăксен команди çĕнсе илчĕ. Асăну ăмăртăвĕсене йĕркелекенсем Тăвай районĕн администраци пуçлăхĕ Юрий Егорович Васильев, Элпуç ял поселенийĕн пуçлăхĕ Василий Васильевич Козлов, райадминистрацире ĕçлекен Евгений Михайлович Дмитриев пулчĕç.
Спонсорсем те чылайăн, вĕсем – райадминистраци пуçлăхĕ Юрий Егорович Васильев, Георгий Сергеевич Сергеев предприниматель, “Журавушка” магазин тытакан Журавлевсем, Анатолий Ильич Григорьев, Владимир Петрович Петров, Юрий Михайлович Борисов предпринимательсем тата ыттисем те. Пурне те питĕ пысăк тав вĕсене çапла чыс тунăшăн. Спонсорсем Владимир Геннадьевичăн 7 класра вĕренекен хĕрне Элинăна пысăк парне – хăвăрт çÿрекен велосипед илсе пачĕç. В.Груздевăн мăшăрĕ Светлана Владимировна тата хĕрĕ Элина та питĕ тав турĕç ăмăртусем йĕркелекенсене, командăсене, спонсорсене, Владимир Геннадьевича асра тытса ăмăртăва пынисене.
Юлашкинчен пурте пĕрле асăну апатне хутшăннă.
Источник: "Ял ĕçченĕ"