03 июля 2012 г.
Пĕрлехи патшалăх экзаменĕсене (ППЭ) кăçал çĕр-шывĕпе 843000 çын хутшăннă, çав шутра шкултан вĕренсе тухакансем – 780000 ытла çын. Чи анлă сарăлнă предметсем (ППЭ тытма ытларахăшĕ вĕсене суйласа илнĕ) – обществознани (54 процент), физика (2554 процент), биологи (1954 процент), истори (1854 процент). 325, 2 пин çын пĕрлехи экзамена виçĕ, 316, 8 пин çын тăватă, 70, 9 пин çын пилĕк предметпа тытнă, географи тата литература предмечĕсемпе экзаменсем тытакан йыш пĕчĕк пулнă (2, 8 тата 554 процент). 2 предметпа кăна тытакансем 100, 8 пин çын пулнă. 7–8 предмет тытакансем те пулнă, анчах вĕсен йыш пысăк мар (2, 6 пин тата 667 çын). ППЭ результачĕсемпе килĕшмесĕр 70000 ытла апелляци панă, вĕсенчен çуррине пăхса тухнă, çав шутран 40 процентне тивĕçтернĕ. Малтанлăх кăтартусем тăрăх вĕренсе тухакансен 3, 25 проценчĕ (25000 çын) патшалăх аттестацийĕ витĕр тухайман. Апелляцисене пăхса тухса пĕтерсен тата июльти тепĕр хут тыттаракан экзаменсем хыççăн ку кăтарту кăштах улшăнма та пултарать.
Иртнĕ çулхипе танлаштарсан, кăçалхи ППЭ, тĕпрен илсен, йĕркеллĕрех иртсе пынă. Экзамен вăхăтĕнче Интернета тухасси çĕршер хут сахалланнă. Федераллă шайра 45 субъектран 172 участник экзамен заданийĕсен фрагменчĕсене Интернета кăларнă. Субъектсенчи экзамен тыттаракан патшалăх комиссийĕсем вĕсен результачĕсене пăрахăçлассипе оперативлă мерăсем йышăнаççĕ.
Контрольпе шутлав материалĕсен (бланк) тытăмĕ улшăннă май хăш-пĕр предметсемпе чи пĕчĕк бал шайĕ çĕкленнĕ. Сăмахран, историпе 32 бала (пĕлтĕр – 30), химипе 32-рен 36 бала, физикăпа 33-рен 36, географипе 35-рен 37 бала çитнĕ, çавна май кирлĕ чухлĕ чи пĕчĕк балл пухайманнисен йышĕ те ÿснĕ.
Тивĕçлĕ сăлтавсене пула тĕп тапхăрта ППЭ тытманнисен шкултан иртнĕ çул вĕренсе тухнисен, комисси ППЭ результачĕсене пăрахăçланă çамрăксен июлĕн 7-мĕшĕнчен пуçласа июлĕн 16-мĕшĕччен тепĕр хут патшалăх тĕрĕслевĕ витĕр тухма май пур.
Источник: "Ял ĕçченĕ"