15 мая 2012 г.
Психологипе педагогика, тÿрленÿпе юсану центрĕнче “Çулталăкри чи лайăх дефектолог–вĕрентекен” 7-мĕш конкурсне пĕтĕмлетнĕ. Тăвай районĕнчи диагностикăпа консультаци центрĕнче ĕçлекен В.И.Белова унта çĕнтерÿçĕ пулса тăнă.
Мускаври педагогика университечĕн дефектологи факультетне пĕтерсе “Учитель-логопед” квалификацине илнĕ вăл. В.Белова ачасен калаçу тата çыру чĕлхинчи кăлтăксене тÿрлетес ĕнпе 12-мĕш çул вăй хурать. Районти диагностикăпа консультаци центрĕнчи ĕçсене йĕркелесе пырать 2006 çултанпа. Валентина Ивановна – психологи тата медицинăпа педагогика комиссийĕн председателĕ, çул çитменнисемпе ĕçлекен тата вĕсен прависене хÿтĕлекен комисси председателĕ. Логопед патне çÿрекен ачасен йышĕ ÿссе пырать. Пултаруллă вĕрентекенĕн професси ăсталăхне кура вĕсен калаçупа çыру чĕлхинчи çитĕнĕвĕсем те курăмлă. Вĕренекенĕсемпе ашшĕ-амăшĕсем хисеплеççĕ В.Белована. Вĕренÿпе воспитани парас ĕçри ÿсĕмсемшĕн 2009 çулта ăна Чăваш Республикин вĕренÿ тата çамрăксен политики министерствин Хисеп грамотине парса чысланă.
Конкурса хутшăнакансем хăйсен ĕçĕ-хĕлĕпе паллаштаракан презентаци, портфолио хатĕрленĕ, скайп урлă харпăр хăй ăсталăхне уçса паракан ыйтусене сÿтсе явнă, видеоурок кăтартнă. Республикăри тĕрлĕ вĕренÿ учрежденийĕсенче ĕçлекен 17 специалист хушшинче пирĕн В.Белова пĕрремĕш вырăн йышăннă. Жюри членĕсем ун ĕçне пур енчен те пысăка хурса хакланă.
“Чăваш енри 2012 çулхи чи лайăх дефектолог–вĕрентекен” ята тивĕçнĕшĕн Валентина Ивановнăна эпир, унăн ĕçтешĕсем тата вĕренекенĕсемпе ашшĕ-амăшĕсем, чун-чĕререн саламлатпăр, малалла тата пысăк çитĕнÿсем тума ăнăçусем сунатпăр.
Источник: "Ял ĕçченĕ"