24 апреля 2012 г.
Ачасен чăваш юррисен республикăри VI “Мехел” телеконкурсĕн çĕнтерÿçисен гала-концерчĕ тата çĕнтерÿçĕсене чысласси Чăваш патшалăх филармонийĕнче иртрĕ. Суйласа илмелли тура 96 исполнитель хутшăнчĕ. Жюри гала-концерта 10 ансамбльпе 16 солиста суйласа илчĕ. Ача-пăчан Тăвайри искусство шкулĕнче вĕренекенсем конкурсăн икĕ турĕ витĕр ăнăçлă тухса, хăйсен пултарулăхĕпе гала-концертра паллаштарма тивĕçрĕç. “Хĕвелчĕк” вокал ансамбль (Юлия Иванова, Елена Иванова, Диана Лаптакова, Катя Петрова, Катя Владимирова, Юлия Камасева, Юлия Федотова) I степеньлĕ лауреатсем пулса тăчĕ (6–9 çулхи ачасен «Ансамбльсемпе хорсем» номинацийĕнче). Чи çамрăк Юля Иванована ятарлă дипломпа тата хаклă парнепе палăртрĕç. Ăна 2 эрнелĕхе Болгарие кайма путевка уйăрса панă. 10–13 çулхи ачасен ансамблĕнчи Ванесса Абржина, Лилия Владимирова, Настя Григорьева, Настя Козлова, Саша Кондратьев, Саша Чернов 2-мĕш степеньлĕ диплома тивĕçрĕç. Ансамбле Галина Николаевна Никонова ертсе пырать.
Çĕнтерÿçĕсен гала-концертне ача-пăча музыкин тата ачалăхăн чаплă уявĕ тесе палăртмалла. Концерт йăлана кĕнĕ тăрăх чăваш халăх поэчĕн Петĕр Хусанкайăн «Мехел» сăвви тăрăх (конкурс ятне те сăвăранах илнĕ) Николай Казаков композитор хывнă юрăпа вĕçленчĕ.
Источник: "Ял ĕçченĕ"