10 декабря 2010 г.
“Ĕç çынна илем кÿрет”, теççĕ. Чăн та, çыннăн пурнăçĕ, телейĕ – ĕçре. Ĕçчен çын çеç пурнăç илемне туять. Хăйĕн ĕçне чунтан парăннă çынсем хамăр хушăрах пур. Вĕсенчен пĕри – Чăваш Республикин тава тивĕçлĕ вĕрентекенĕ, Тушкилти вăтам шкулта пурнăç хăрушсăрлăхĕн никĕсĕсене тата физкультура урокĕсене ертсе пыракан Н.Ф.Давыдов.
Николай Филимонович 1960 çулхи раштав уйăхĕнче Ямпулат ялĕнче çут тĕнчене килнĕ. Тушкилти вăтам шкултан вĕренсе тухсан, Çĕнĕ Шупашкарти профессипе техника училищинче электросварщик специальноçне алла илнĕ. Ун хыççăн 3 çул Тинĕс–Çар Флотĕнче хĕсметре тăнă. Вăл киле таврăннă тĕле ялти шкулта шăп та лăп çар вĕрентĕвĕн ертÿçи кирлĕ пулнă. Шкулта вĕреннĕ чухнех спортпа туслă пулнă çамрăка ертÿçĕсем хаваспах ĕçе йышăннă. Çапла майпа Николай Филимонович вĕрентекен пулса тăнă. 8 çул çар ĕçне хăнăхтарнă вăл хăйĕн вĕренекенĕсене. Ĕçленĕ хушăрах Хусанти запасри офицерсене хатĕрлекен курсра вĕренсе ВЛКСМ Чăваш обкомĕн Хисеп грамотине тивĕçнĕ. 1990–1995 çулсенче куçăмсăр майпа Иван Яковлевич Яковлев ячĕллĕ Чăваш патшалăх педагогика институтĕнчи физкультура факультетĕнче вĕренсе аслă пĕлÿ илнĕ. Физкультура урокĕсене ирттерме пуçланă çамрăк вĕрентекен. Шкулта тĕл перекенсен секцине йĕркеленĕ. “Атьăр-ха, каччăсем!” конкурса кашни çулах интереслĕ ирттерет.
Николай Филимонович тăрăшнипе “Зарница” тата “Орленок” çар вăййисенче пирĕн шкулта вĕренекенсем çулсеренех малти вырăнсем йышăнаççĕ. 1999 çулта, акă, “Зарницăн” республикăри финалĕнче çĕнтернĕшĕн тушкилсем Хура тинĕс хĕррине кайса канма тивĕçрĕç. 2000 çулта “Орленок” вăйăра çамрăк армеецсем 3-мĕш вырăн йышăннă. Районта иртекен “Çар службине кайăттăм” конкурсра та Н.Ф.Давыдов вĕренекенĕсем яланах малта. Физкультурăпа тата ОБЖпа иртекен олимпиадăсенче те тушкилсем çĕнтерÿçĕсем пулаççĕ. Пĕлтĕрхи вĕренÿ çулĕнче Алексей Андреев, кăçал Максим Исаев ОБЖпа 3-мĕш вырăна тивĕçнĕ.
Волейболпа баскетбол вăййисене аталантарассине пысăк тимлĕх уйăрать тăрăшуллă вĕрентекен. Хĕрсен баскетбол команди, çулсеренех районти ăмăртусенче 1-мĕш вырăн йышăнса, республикăри ăмăртусене хутшăнма тивĕç пулать. Республикăри ăмăртусенче яшсем те çуллен палăраççĕ. Халĕ Николай Филимонович çамрăк волейболисткăсен секцине йĕркеленĕ. Унта 7–9 классенче пĕлÿ пухакансем хаваспах çÿреççĕ. Сăмах май каласан, унăн воспитанницисем темиçе çул каялла республикăри хуласен командисемпе тан тупăшатчĕç.
Пултаруллă вĕрентекен ялта иртекен мероприятисене те хастар хутшăнать, спорт ăмăртăвĕсене те, концертсене те. Тушкил ял поселенийĕн команди тĕрлĕ ăмăртусенче çĕнтернинче Николай Филимоновичăн тÿпи те пысăк.
2001 çулта Н.Ф.Давыдова Чăваш Республикин тава тивĕçлĕ вĕрентекенĕ ят панă.
Эпир хамăрăн ĕçтешĕмĕре паллă юбилей ячĕпе саламласа хăюллăн малалла утма юман пек çирĕп сывлăх, çăл куç пек тапса тăракан иксĕлми вăй-хал сунатпăр. Ĕçĕрсем яланах ăнса пыччăр!
Источник: "Ял ĕçченĕ"